VIGAN CITY, ILOCOS SUR - Karong adlawa na ang opisyal nga pagsugod sa 61st Palarong Pambansa sa dakbayan sa Vigan, Ilocos Sur.
Usa sa pinasidunggang mga dinapit sa opening program mao si Presidente Roridgo Duterte diin siya mao ang keynote speaker ug ang mo-deklarar sa opisyal nga pagsugod sa 2018 nga edisyon sa kompetisyon.
Kagahapon, bisan wala pa pormal nga gibuksan ang kompetisyon apan aduna na’y gisugdan nga mga duwa.
Pipila sa mga medalist sa miaging tuig nga gikan sa Central Visayas Regional Athletic Association (CVIRAA) ang malaumon nga makaangkon og gold medals karong tuiga.
Usa na niini sio Thaniel Jan Sapio, 12, kinsa representante sa CVIRAA sa arnis boys secondary division.
Niadtong 2017, duha ka silver medals ug usa ka bronze medal ang nakuha ni Sapio sa susamang event.
“Sa first salig lang sa Ginoo. Salig sa kaugalingon ug sa trainor nga kung ihatag lang gyud ang best sa imong performance ug isulod sa utok nga maka-gold ka,” matod ni Sapio sa pagpakighinabi sa Superbalita Cebu.
Lumad sa Pajo, Lapu-Lapu si Sapio diin sumusunod usab sa iyang maguwang nga si Ella Marie, gold medalist usab niadtong niaging tuig sa susamang sport diin pareho sila nga tinun-an sa Pajo National High School.
Sa laing bahin, usa ka mapasigarbuong inahan nga si Aritas Quiñanola malaumon usab nga maka-gold usab ang iyang anak nga si Glybel Jane karong tuiga sa chess.
Ang 17 anyos nga atleta nakaangkon og upat ka silver medals sa miaging tuig.
Si Francis Ramirez, sports coordinator sa DepEd Cebu City, nagkanayon nga gianad na nila ang ilang atleta atol sa usa ka buwan nga unified training sa dakbayan sa Sugbo og init aron dili na mabag-uhang mokombati ning panahon sa ting-init.
Malaumon usab kini nga karong tuiga mosaka ang ranking sa Cviraa gikan sa 9th place niadtong nakalabay nga tuig.
Si DepEd 7 assistant regional director Sal Jimenez malaumon nga masulod sa top 5 ang team Cviraa ning higayuna.
Moabot sa 857 ang mga delegado sa Cviraa diin 710 niini ang atleta (elementary ug secondary) samtang ang uban kay coaches, chaperones, trainers, ug officiating officials.
Aduna’y duha ka billeting ang Cviraa diin anaa sa Cabittaogan Elementary ug National High School sa Cabittaogan, Sta. Catalina; ug sa Sta. Catalina Central School.
Aron masiguro nga luwas ang batang mga atleta, aduna kini sila’y curfew nga alas 9:00 sa gabii.