Sapyaw kinahanglan na sa pumpboat

MGA pumpboat sa Lapu-La­pu City gikihananglan nga adunay sapyaw nga maoy ilang gamiton sa pagkuha sa mga manglutaw nga hugaw sa dagat nga ilang malabyan.

Ang City Fisheries and A­­­quatic Resources Management Council (CFARMC) inabagan sa City Environment and Natural Resources Office (CENRO) ang mangatang sa mga pantalan sa siyudad aron pagsusi kon ang matag pumpboat hitsas sa sapyaw.

“Were strictly doing this. Lisod naman gud nga ang atong atensiyon matawag, why not do something,” tipik sa pamahayag ni Mayor Paz Radaza.

Susihon sa CFARMC ang volume sa mga basura nga masapyaw sa operator.

Ang grupo ni Andy Berame hepe sa City Disaster Risk Reduction Management mihimo og regular under water clean-up sa nagkadaiyang dapit sa Hilutungan channel sud na sa pipila ka mga katuigan.

Samtang, ang CENRO usab ang gitahasan sa pagmonitor sa mga beach resort, hotel and restaurant ilabi sa ilang pinaagi sa pagproseso sa water treatment ug ang papahigayon og water examination aron masuta kon dili ba kontaminado ang tubig dagat diha sa ilang establisemento.

Matod pa ni Radaza nga surprise water examination ang gihimo sa Siyudad ug kadtong masuta nga adunay presensiya sa e. coliform bacteria ipaubos sa imbestigasyon ang establisemento ug ang pagsusi kon ni-agi ba sa Sewerage Treatment Plant (STP).

Nipasabot ang mayor nga gi­kihananglang ipaubos sa water treatment ang tanang waste water gikan sa establishment aron nga luwas sa higayon nga i-discharge sa dagat.

“Ang CENRO is the one checking kon enough ba ang capacity sa STP nila,” dason ni Radaza.

Nasayran nga nasusi na ang barangay Punta Engaño ug Mactan.

Nasayran base sa Environment Management Bureau (EMB) sa Department of Environment and Natural Resources (DENR) nga adunay kapin sa 120 ka mga hotel and restaurant violators kansang discharge permit na-expired.

Gitambagan ang mga establishment sa pag-renew sa ilang permit aron dili mahasol sa ilang operasyon.

Ang Lapu-Lapu, nailang Historic Resort City, niumol og team nga gitahasan nga mosusi sa kada­gatan sa Mactan aron mahisama sa Boracay nga termporaryong gisi­rad-an sa publiko. (FVQ)