3 patay, 7 angol sa bangga

DUHA ang patay ug pito ang angol sa bangga sa tulo ka mga sakyanan sa national highway sa Barangay Taloot, lungsod sa Argao kagahapon, alas 10:50 sa buntag.

Samtang, patay ang drayber sa motorsiklo nga nibangga sa Toyota Innova sa Barangay Tulic sa samang lungsod niadtong Sabado sa sayong gabii.

Sa disgrasya sa Taloot, patay dihadiha si Vince Villaces, 4-anyos, taga Minglanilla ug nakabsan sa kinabuhi sa ospital ang iyang lola nga si Virgilia Sillote, 61, ug kritikal ang iyang bana nga si si Aquilio Sillote, 62.

Nangaangol mao ang ilang anak ug mga apo nga sila si Maricel Sillote, 29; Kurt Lenmark Fat, 5; Reymark Villaces, 9; ug Ayisha Sillote, 9.

Si PO2 Clifford Butron, traffic investigator sa Argao Police nga nahinabi sa Superbalita Cebu niingon nga ang mga biktima sakay sa multicab nga gimaniho ni Aquilio Sillote gikan sila sa lungsod sa Santander padulong mopauli sa Minglanilla.

Samtang nagsubay kini sa national highway nga kurbada ug nikawat sa pikas lane, kalit kining mibangga sa gikasugat nga Prime Mover ABK-5832 nga gipanag-iya sa United Auctioner, Inc. nga gimaniho ni Leonil Judith, 32, taga dakbayan sa Lapu-Lapu.

Atol sa hitabo, naapil ang Toyota Wigo A2R 484 nga gimaniho ni Julius Caezar Olayvar, 29, taga Tungkil Minglanilla ug ang Kia Sorento YLE 466 nga gimaniho ni Sulficio Ubod, 67, taga Guadalupe, dakbayan sa Sugbo, diin nangaangol sila uban sa iyang asawa nga si Carmen Ubod.

Matod ni PO2 Butron, nga si Olayvar nga nagmaniho sa Toyota Wigo mitug-an kaniya nga nagsunod siya sa multicab distansiyag 10 metros samtang nagsunod sab niya ang Kia nga gimaniho ni Ubod.

Gibutyag niini nga samtang nagsubay sila sa national highway dili kaayo kusog ang dagan kay kurbada, nabantayan niini nga mikawat sa pikas lane ang multicab hinungdan nga mibangga sa gikasugat nga Prime Mover nga padulong sa Poblacion Argao kay maghatod sa feeds sa manok nga karga.

Tungod sa kusog nga impact, natuyok pabalik ang multicab hinungdan sa pagkapiit sa mga biktima.

Sa kakusog sa impact, ang drayber sa Prime Mover mimaniobra sa sakyanan apan nibuto ang ligid hinungdan nga nikawat kini sa pikas linya ug nadaro ang Kia Sorento dayon nalahos sa kabakhawan.

Si Olayvar nisulti sa kapulisan nga dihang nakita niya nga nabangga ang multicab nidali sab siya sa pag-brake sa iyang sakyanan bisan paman niini, mibangga gihapon sila sa multicab apan dili na kusog.

Si PO2 Butron nipadayag nga dakong posibilidad nga ang nagmaniho sa multicab nga si Aquilio nakatulog hinungdan nga nabangga.

Ang drayber sa Prime Mover boluntaryong nitahan sa kapulisan ug gitanggong samtang gipaabot ang kabanay sa mga biktima.

Samtang, hubog patay human ang iyang motorsiklo nibangga sa Toyota Innova niadtong Sabado sa alas 6:45 sa gabii sa national highway sa Brgy. Tulic, Argao.

Si Jerry Cariñosa, 31, taga Brgy. Bogo, Argao, patay dihadiha human iyang motorsiklong gisakyan nibangga sa Innova YFY-260 nga gimaniho ni Nisel Celerio, 44, taga lungsod sa Dalaguete.

Si SPO4 Esteban Albuera sa Argao police nibutyag sa Superbalita Cebu nga kusog nakapadagan ang biktima padulong mipauli.

Giingong nakainom kini ug pag-abot sa maong dapit kalit nga nikawat sa pikas lane bsua gikasugat ang Toyota Innova.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph