SECTIONS
Saturday August 18, 2018

Meditalk: Tinuod ba nga ang collagen maoy tubod sa kabatan-on o atik lang? (2)

(Pasiuna: Kini ang atong apas-sumpay sa suliran nga gipadangat kanato ni Inday of SIR Matina mahitungod sa iyang pangutana mahitungod sa collagen nga suplemento.)

Dear Inday of SIR Matina,

Ug karon sa atong pagpadayon sa pagtubag sa imong gipadangat kanato nga isyu, kining collagen mao gayud kini ang usa ka nag-unang produkto karon nga interesado ang kadaghanan.

Kini usab ang usa sa pinaka kontrobersyal karong mga panahona.

Atong tutukan kining collagen aron masabtan gayud nato sa hingpit ug unsa man ang ginahimo niini sa atong lawas. Kining collagen mao kini ang protina nga naghikot sa mga kaunoran nato. Susama kini sa papilit nga naghupot sa lawas arondili mabungkag. Mao usab kini ang istraktura nga mao ang gi tindugan sa lawas.

Ang collagen ang nisangkap sa sitenta y singko porsiyento sa
uga nga timbang sa panit, ug mao ang naghatag sa katambukon aron mapabilin nga mag-umbok ang panit ug mapugngan ang mga kunot sa nawong. Bahandi-anon usab kini sa mga amino acids nga susama sa proline ug glycine nga gikinahanglan aron mamintinar ug maayo ang mga lutahan ug mga kabukugan.

Apan, ang problema sa panahon nga nagka-edad na kita, paspas kaayo nato nga mapulpog kini kaysa atong mahulipan. Mao nga sa panahon nga matiguwang na ang usa ka tawo, mokunot na tawon ang pamanit ug maglisud na og lakaw ug lihuk- lihok.

Kining pag-indyek sa collagen wala gayud kaayo kini giawhag sa kadaghanan sa nagapraktis sa medisina, tungod kay gawas pa nga sa mahal kini, dili usab kini molungtad og dugay kung ikumpara sa uban nga mga pangpaumbok ug dako pa gayud ang kahigayunan nga maka alerdyik.

Apan sa niaging mga katuigan, nakit-an nato nga daghan na sa mga tawo ang nagakaon niini aron mahimo nga mas batan-on ang hitsura. Ug gani, gisuportahan pa gayud kini ug impresibo nga mga pagtuon nga nagpakita nga ang pag-inom ug pag kunsumo niining collagen makahatag gayud ug dakong epekto sa hitsura sa pamanit.

Apan, tungod kay taas-taas pa man gihapon ang atong pagahisgutan mahitungod niining imong sitwasyon, tugoti na usab ako nga ato kini nga padayunon pagtuki sa mga sunod nga edisyon niining atong patik. Hangtud na usab sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o SunStar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)


VIEW COMMENTS