SECTIONS
Saturday August 18, 2018

Editoryal: Epal sa eleksyon

ADLAW nga Sabado nagsugod ang filing sa Certificate of Candidacy (COC) alang sa Sangguniang Kabataan (SK) ug Barangay elections.

Nangabot sa mga buhatan sa Commission on Elections (Comelec) sa tibuok nasud ang mga buot magpapili sa SK, sa pagka-kagawad ug sa pagka-kapitan sa barangay.

Nagkadaiya ang gimik sa mga mokandidato kay diha palang daan sa pag-file og COC, giubanan na sa mga supporters, ang uban migamit og banda, diha say uban nga daw nangampanya na.

Gani sa unang adlaw palang sa filing sa COC, makita na nga gipangbitay ug gipamilit ang mga posters ug ubang mga campaign paraphernalia.

Naa pay nakabutang nga "vote" dunay "iboto pag-usab" duna say “iboto nato pag-balik kay masaligan,” pipila lamang kini sa mga pulong nga anaa sa mga posters uban sa hulagway sa kandidato.

Kining tanan, nahitabo sa unang adlaw sa election period di lamang sa Davao Region, sa Davao City apan lukop nasud, nga unta di pa kini puwede, ug supak sa Omnibus Election Code.

Sila ang gitawag sa katawhan nga "epal" kay bisan wala pa ang campaign period, nag-una una naman og pamilit sa ilang mga posters.

Unsa kaha ilang mahimong papel sa barangay kung kining mga epal karon modaug human sa eleksyon?

Hinuon wa ta masayod, apan atoa lamang segurohon nga di ta magpalingla sa ilang mga gimik, ug atong analisaron ug tugkaron ang ilang tinuod nga pagkatawo aron di kita magmahay pag-abot sa panahon.

Ma-monitor sab unta sa Comelec ang mga misupak sa balaod aron masilutan di lamang ang mga epal, lakip sab ang mga tikasan.


VIEW COMMENTS