SECTIONS
Monday, May 27, 2019

Luzano: Duterte...Adda darana kano a Tsino? H-haaa!!!???

MORIONES, este, Maryunes! Ni Pres. Duterte…adda darana a Tsino? Siento porsiyento, adu manen a kiday ti nababtuog a nagsuek iti daytoy nga isyu. Ngem..sakbay nga intay luditluditen nga igusgusogos…kalmante lang, pards ta intay man pay siripen dagiti immasok kada immapoy a kontrobersiya itay laeng kallabes nga aldaw:

Immasuk ti ngalangala dagiti agkakangato nga opisyales ti Korte Suprema iti eksena ti Quo Warranto petition kontra CJ Maria Lourdes Sereno a naisaang ditoy siyudad ti Baguio idi Abril 10. Gapu laeng iti SALN issue…nagpipinnudotda a kasla ubbing.

Ngem ala, ipadisitayon ti eksena tangay posible kano nga inton Hunyo pay a madesisyonan ti nakuna a kontrobersiya. Naka-recess ti Korte Suprema iti sibubukel a bulan ti Mayo isu a dakkel ti posibilidadna nga inton Hunyon laengen a maammuan ti desisyon dagiti mahistrado.

Ngem ita pay laeng…adun dagiti nabara a diskusyon ken pattapatta nangruna iti maysa a mensahe ni CJ Sereno a “no maikkat daytoy iti kina-Chief Justice babaen iti Quo Warranto proceedings…mabalin kano met a mapasamak kadagiti kaduana iti hudikatura.”

Kuna met dagiti matektekanen nga agur-uray: ipartakda la koman nga isaang iti plenaryo ti Kamara ti Articles of Impeachment kontra iti Chief Justice. Dayta met ti kayat ni Pres. Dduterte, saan aya?

Sabagay, adda met panniguro ni House Speaker Pantaleon Alvarez ken House Justice Com. Chairman Rep. Reynaldo Umali nga isaangda kanon a sigida ti Articles of Impeachment iti panaglukat ti session ti Kamara inton Mayo 14 wenno Mayo 15. Ti sumaruno dita ket pagbobotosandan.

Innayon pay ni Umali a mapan iti dua wenno tallo laeng nga aldaw, malpasen ti proseso ket ipangatodan ti kaso iti Senado nga agbanag a kas Impeachment Court.

Simmaruno nga immasuk ti gimluong a linaon ti draft ti committee report ni Sen. Richard Gordon, chairman ti Senate Blue Ribbon Committee….a rumbeng nga adda sungsungbatan a kaso ni sigud a Presidente Benigno “Noynoy” Aquino III iti palpak a bakuna –Dengvaxia.

Kas linaon ti report, responsable kano ni Aquino gapu iti iyaanamongna iti pannakagatang kadagiditi anti-dengue vaccine a Dengvaxia na mabalin kano a gapu iti nakatayan ti no manon a biktima (kaadduan ket ubbing.

Iti findings ken konklusyon iti nakuna a committee report, guilty kano ni Aquino iti MAFEASANCE, MISFEASANCE ken NONFEASANCE. Ti kadagsenan kano a nagbasolanna ket ti panangitayana iti biag dagiti ubbing babaen iti dayta a bakuna. Ni Aquino kano ket “guilty” sipud pay nakipag-meting kadagiti opisyales ti Sanofi idiay Beijing idi Nobyembre 9, 2014.

Nadaras kano ti pannakagatang iti Dengvaxia Vaccine a didan dimngeg kadagiti ballaag dagiti eksperto panggep kadagiti pagdaksan ti nakuna a bakuna. Malaksid kenni Aquino, inrikemda met ti komite a makassuan da sigud a Budget Sec. Butch Abad, sigud a DOH Sec. Janette Garin ken dadduma pay nga opisyales.

Maibilang iti nairekomenda a kaso dagitoy: panaglabsing iti R.A 3019 wenno Anti-graft and Corrupt Practices Act; R.A. 6713 wenno ti Code of Conduct and Ethical Standards for Public Officials and Employees. Innayon pay ni Sen. Gordon iti reportna a no mapaneknekan a ti Dengvaxia a talaga ti nakatayan kadagiti biktima a nabakunaan…mainayon kadagita a kaso ti HOMECIDE.

Bayat iti kaadda ni Pres. Duterte sadiay China iti maysa a napateg a taripnong ken iti ibibisitana kadagiti Filipino Communities sadiay Hongkong…gimmiddan met dagiti kontrobersiya iti umadanin mapasaraduan a Boracay inton April 26.

Adda ngamin agkunkuna a mabalinda kano nga iringpas ti panagdalusda iti Boracay iti uneg laeng ti uppat a bulan. Nupay adu dagiti parikut nga inda sanguen iti dayta a panawen ti rehab…adda met dagiti pamkuatan dagiti apektado (empleados o negosyante) tapno dida unay malugi.

Natural, sirsiripen metten ti gobyerno dagiti anggulo no apay a nagbanag a parikut ti mabigbigbig a tourist destination ti pagilian.

Mabalin nga adu nga ulo ti mapung-ir apaman a malpas ti imbestigasyon. Kuna met dagiti eksperto iti rehab…baro a Boracay ti maipasngay a mas maipannakkel ken maipasindayag iti sangalubongan.

No sisibibiag koma daydi lolok….maymaysa laeng ti linya ti utekna: political will ti pinal a solusyon dayta a parikut.

Mismo a ti political will wenno natangken a determinasyon ni Pres. Duterte ti timon iti panagluposto ti Boracay. Ngem kasla mariknak ti sakuntip ken musiig daydi lolok: masayangan ta saanna pay a nabaddekan ti kadaratan ti Boracay.

Kasano ket ti laeng gayadan ti pandiling daydi lolak ti binadbaddekanna. Sabagay, adda met political will daydi lolok…impatangkenna a daydi laeng lolak ti kinapinnunganna, malaksid iti dadduma, ngek!

Dagita dagitay gimmiddan a kontrobersiya bayat iti kaadda ni Pres. Digong idiay China. Sanabale, kunada…ta nabunga manen ti biahe ni Presidente Digong.

Pa-empleo, suporta kadagiti programana nangruna kontra droga ken kontra krimen ken adu pay a napagnumuanda kadagiti lideres ti Tsina ti sentro ti official visit. Ngem kangrunaan ti amin ket ti panagkaykaysada a nagplano panggep iti solusyon kagiti parikut sadiay South China Sea.

Kunada ngarud: no matuloy ti panggep a joint exploration ventures kadagita kontrobersiya nga isla…adda dakkel a pagnumaran para iti panagdur-as ti supapak ti Pilipinas. Nupay adu dagiti agam-amak iti nasariwawwek a plano…adu met dagiti kumanunong.

Arasaasda: arigtayo laeng ti ipes kumpara iti higante a puwersa ti Tsina…awan gawaytayo no gubat ti saritaan. Ngem no magnatayo iti diplomasya a makitunos ken makinegosyo iti dayta a higante…mas pagnam-ayan ti pulitayo, saan ngata?

Kalbitentayon ti rugi ti Karit, pards. Pudno ngata nga adda darana a Tsino ni Pres. Duterte? Saan met nga apelyido ti Tsino ti Duterte wenno pulida a Roa.

Imbag pay kano ni Bong Go ta uni’t Tsino ti apelyidona. Tssk tsk…awan mabalintayo, pards no mismo a ni Pres. Duterte ti nag-research wenno nagsukisok ken nakaduptal a dagiti gayam nagkauna a tuodna ket adda darada a Tsino.

Natural nga adda met natawid ni Digong dita, saan aya? Sabagay…adu dagiti pammaneknek iti pakasaritaan ti pagilian nga idi ubing pay ti Pilipinas, adu dagiti nagdappat a nagnegosyo ditoy karamanen dagiti Tsino. Isuda ketdi ti kaadduan kadagiti nagkauna a nagnegosyo ken nagbaknangan ti pagilian gapu iti anus ken gagetda.

So…dakkel ti posibilidadna a pudno ti researches ni Digong. Hmmm…call Pres. President! Uray dagiti nagpresidente nga Aquino ket naibagbagada met idi nga adda kano pulida a Tsino. Ngem apay nga awan naitsismis idi ni Pres. Erap ken Pres. Tabako? Wen aya! Sige, maminsanton nga intay tsismisen ta kurangen ti oras. Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!