SECTIONS
Monday July 23, 2018

Nalzaro: Gipiyaet ni Franz Sabalones?

UBAY-UBAY na nga mga underlings o kasosyo sa illegal nga drugas ni self-confessed druglord Franz Sabalones ang nangatumba o gipatay. Si Sabalones kinsa nag-operate sa habagatang bahin sa lalawigan sa Sugbo boluntaryo kining mitahan ngadto ni PNP Chief Ronald “Bato” Dela Rosa niadtong 2016 sa dihang gilusad na sa administrasyong Duterte ang hugot na nga kampaniya batok sa illegal nga drugas.

Anaa na siya karon ubos sa government custody ug wala mapasakai og kaso. Apan gi-freeze o i-recover sa kagamhanan ang iyang mga deposito sa bangko ug mga propiyedad apil na ang usa ka maanidot mga beach resort sa lungsod sa San Fernando. Yano lang nga pagkatawo si Sabalones niadto sa wala pa mosulod sa illegal nga drugas. Gani naka-trabaho siya isip usa ka traffic enforcer sa dakbayan sa Sugbo.

Karong bag-o, si Konsehal Niel Abella sa barangay San Isidro sa San Fernando, kinsa giingon nga bagman ni Sabalones gipusil patay sa wala pa mailhi nga mamumuno diha sa usa ka fast food chain sa Gen. Maxilom Ave., Cebu City. Si Abella, misurender kaniadto sa kapulisan sa San Fernando gumikan sa Oplan Tukhang. Miangkon siya nga usa ka drug user. Anaa sa listahan sa kapulisan si Abella nga miduwa sa illegal drugs.

Daghan na nga mga kasosyo ni Sabalones ang gipatay. Gani ang pagpusil-patay usab ni kanhi Talisay City councilor Emil Go, gidudahan man nga adunay kalambigitan sa illegal drugs ug dili sa illegal nga sugal. Dili kaha si Sabalones ra mismo ang mitug-an o mipiyaet sa kapulisan kon si kinsa kadtong iyang mga kaalyado? Posible nga gigamit lang sa kagamhanan si Sabalones aron itudlo kon si kinsa ang iyang mga sakop kaniadto?

Sama sa akong gikaingon sa makadaghang higayon nga dako ang akong pagduda nga kining mga pagpamatay sa mga gidudahang drug personalities, adunay nagpaluyo niini. Ug ang akong pagduda mao nga adunay papel ang atong kagamhanan niini. Dili buot ipasabot nga binuhatan kini sa kapulisan kay dali man silang mailhan. Adunay grupo sa mga gun for hire nga gibayaran sa kapulisan. (bobbygnalzaro@gmail.com)


VIEW COMMENTS