GITUOHANG gibiyaan sa iyang mga kaubang sakop sa New People’s Army (NPA) ang usa ka mabdos nga samdan atol sa engkwentro sa bukirang bahin sa Sitio Ulayanon, Barangay Kalabugao, Impasug-ong, Bukidnon.
Giila sa mga militar ang maong lima ka bulan nga mabdos nga mao si Susan Guaynon, 22.
Nasayran nga gibiyaan lamang sa iyang mga kaubanan nga NPA si Susan, kinsa samaron ug nangayo'g pakitabang human maigo kini sa bala.
Sa pakighinabi sa SunStar Superbalita kang Second Lieutenant Tere Ingente, tigpamaba sa 4th Infantry Division, hugot ang ilang pagtuo nga sakop kining maong mabdos sa NPA human nga anaa kini sa area sa maong panag-engkwentro ug nakaangkon kini og daplis sa bala sa iyang agtang.
“Naa man gud siya sa encounter site ug na-igo siya sa bala, daplis sa bala and as per revelation, iyang bana kauban nila didto sa encounter, so meaning, member siya sa NPA. Di pa mahibaw-an pila siya sa kabulan sa kalihokan,” pahayag ni Ingente.
Gitoohan usab sa militar nga aduna’y mga samaran ug bisan namatay nga sakop sa NPA tungod sa mga nakitang pat-ak sa dugo sa withdrawal area.
“Dili nato mahibal-an, dili nato ma-confirmed mao na ang isa, katong wounded nga babaye unya ang the rest naa ta’y nakit-an sa withdrawal road nga mga blood stain, so posible nga aduna ta’y wounded sab didto sa NPA. Ongoing pa atong pursuit operation up to now,” dugang pahayag ni Ingente.
Gikabutyag nga aduna’y natigayong pagbinaylo-ay sa bala tali sa tropa sa militarya ilalom sa 8th Infantry Battalion ubos na usab sa kamandoan sa 403rd Infantry Brigade ug sa giingong mokabat 40 ka mga membro sa NPA nga ubos sa headquarters Force NEO Compaq of North Central Mindanao Regional Committee niadtong milabay nga adlaw.
Narekober sa maong dapit ang ubay-ubay ka mga high-powered nga mga armas sama sa mga nagkadaiyang rifles, mga AK 47, air gun, 30 ka mga backpack nga adunay mga personal nga mga gamit ug dokumento.
Padayon pa ang pursuit operation sa kasundalohan sa maong dapit.