SECTIONS
Monday July 23, 2018

Editoryal: BRT mababagan sa LRT?

KON di makasugat og pagbabag, hayag ang posibilidad nga mahinayon na gyud ning gipaabot nga proyekto nga nalantawang usa sa makatabang sa pagsulbad sa kahuot sa dagan sa trapiko sa Metro Cebu.

Buot natong ipasabot mao kining gi-propose nga Light Rail Transit (LRT) nga gihugonhugonan nga masugdan sunod tuig.

Kini manukad gikan sa siyudad sa Carcar paingon sa dakbayan sa Sugbo ug molahos didto sa dakbayan sa Danao.

Dunay mga pundok karon nga gilangkuban sa mga dagko ug ekspiyertong tigpatigayon gikan sa China ug mga Filipino companies nga nakig-ayuda na sa Department of Transportation (DOTr) kalabot niining maong proyekto.

Sa niaging tuig pa diay ni gisugdan og estudiyo ug hapit na mahuman ang pagproseso sa mga dokumento niini.

Matod pa nga apil sa mao usab nga proyekto mao ang laing linya sa LRT nga mag ngadto-ngari usab sa airport.

Unya ang nakanindot niini kay dili makapagawas og kuwarta ang gobiyerno kay ang pundo nga gamiton niini ipaagi man sa “One Belt One Road” program sa Chinese government.

Si Engr. Manuel Jamonir, ang business development manager sa Udenna Infrastructure Corp., mipasabot nga inig abot sa rail transport sa dakbayan sa Sugbo moagi kini sa subway o underpass, pero inig gawas niini ngadto sa ubang dapit sa ibabaw na usab nga railway mosubay.

So kon mao ni, di kaha mosupak si Cebu City Mayor Tomas Osmena niini, kay labing siguro maigo ug mababagan man sa maong proyekto ang iyang Bus Rapid Transit (BRT) project?

Nanganti na ra ba ni Osmena nga iyang ipadayon ang iyang BRT bisan pa man og nakasugat kini og daghang reklamo.

Hangtod karon, bisag anino wa pa tay nakita nga nakasugod na ang BRT ni Osmena bisan tuod og taodtaod na kining giplano.

Sa sitwasyon karon morag nabintahaan ang BRT sa LRT.


VIEW COMMENTS