SECTIONS
Wednesday August 15, 2018

Tambagi Ko Noy Tikyo: Gipasakitan

Dear Noy Tikyo,

Good day! My name is Clyde, 25 years old. Duna koy karelasyon sulod na sa usa ka tuig. Love kaayo nako si Precy, di tungod kay guwapa siya ug bigot og lawas, apan tungod kay naa niya ang akong gipangita sa usa ka babaye.

Apan wa ko magdahom karon nga iya na man kong gipasakitan nga unta ako mang gibuhat ang tanan aron nga malipay siya.

Niadtong miaging semana, nahibulong ko kay di na man ko niya paadtuon sa ilang balay sa may Sasa, Davao City. Daghan siya og alibi kay magtuon daw siya o duna silay lakwon sa iyang pamilya ug uban pa.

Apan usa ka adlaw sa dihang niadto gyud ko sa ilang balay bisan sa iyang pasidaan, wala ko magdahom nga naabtan nako ang iyang best friend didto nga lalaki ug nagtupad og lingkod kaniya. Ug labaw nga nakurat ko kay naggunitay sila sa ilang mga kamot ug sweet kaayo.

Base sa akong nakita, nagtuo ko nga ang ilang feeling sa usag-usa it's more than friendship. Bisan unsaon pa niya og deny, klaro na nako nga duna na siyay gitago kanako.

Karon wa na ko magpakita niya kay nasakitan ko kaayo. Mao ni akong problema unsaon nako pag-move on.

CLYDE


Clyde,

Angay nimong dawaton nga kutob lang dinhi ang inyong relasyon. Ingon man gyud niini ang pagpakigrelasyon nga kon naay milampos, naa say wala. Ug gikasubo ko nga ang inyo nahiuban sa wala milampos.

Sakit man tuod ang kamatuoran nga giluiban ka sa imong girlfriend apan di kini maoy rason nga di ka na mopadayon sa imong kinabuhi.

Ang pagdawat sa masakit nimong kasinatian sa relasyon, maoy una nimong himuon aron nga maka-move on ka. Kon di ka makadawat niini, seguradong hangtud sa hangtud di ka makarekober gikan niini ug kini unya ang hinungdan sa daghang mong mga frustrations ug kapakyasan sa kinabuhi.

Timan-i nga lisud man tuod ang paghikalimot kaniya kay nahimo na man siyang kabahin sa imong kasingkasing, apan I think di siya maoy babaye nga para nimo ug angay mo na siyang buhian.

Sakit man tuod ang imong naagian, apan nagtuo ko nga dako kini nga leksiyon para kanimo alang sa sunod nimong pagpakigrelasyon.

Di maayong ipadayon ang relasyon nga usa ray nalipay samtang ikaw nasakitan.

NOY TIKYO


VIEW COMMENTS