KON kaniadto anaa sa boxing ring ang pakigbisog ni Jimrex “The Executioner” Jaca, karon anaa na kini sa kadalanan sa dakbayan sa Talisay.
Si Jaca kinsa sa tinuod nga kinabuhi mao si Jemuel Divino, 34, nakit-an sa SunStar Cebu nga nag-man sa trapiko sa kadalanan sa dakbayan sa Talisay.
Gibutyag niya nga karon nalingaw siya sa iyang trabaho.
“Mas nalingaw ko aning akong pagka-traffic enforcer, dili tungod kay gusto lang ko mo-man og traffic, pero kay nakatabang ko sa mga tawo,” matod ni Jaca.
Si Jaca, sa iyang tibuok boxing career, niangkon og 40 ka mga daog sa iyang 52 ka mga away sulod sa 15 ka tuig sa iyang professional boxing.
Dihang nagpangedaron siya og 17 niadtong 2001, usa si Bobby Pacquiao, igsuon ni Manny Pacquiao, nga napildi ni Jaca.
Si Jaca, kinsa kaniadto Oriental and Pacific Boxing Federation Superbantam weight champion ug World Boxing Organization (WBO) Asia Pacific Super Feartherweight champion, niretiro sa iyang pagkaboksidor dihang nasakit ang iyang asawa og diabetes niadtong 2015.
Uwahing away niini batok kang Pablo Lugo Montiel sa Dubai, diin siya nidaog.
Sukad nga nagkasakit iyang asawa nga si Brendalyn, giasikaso na niya kini lakip ang ilang nag-inusara nga anak nga babaye.
Gihulagway pa ni Jaca nga ang kamatayon sa iyang asawa niadtong nakalabay nga tuig mao ang labing bati nga kasinatian niya itandi sa mga knocked down sa ring.
“Sakit gyud. Nawagtangan gyud ko sa hunahuna ato,” paghulagway ni Jaca sa iyang gihambin nga kasakit.
Bisan paman sa mga tanyag kaniya human sa kamatayon sa iyang asawa, apan wala kini dawata sa boksidor.
Niadtong miaging buwan lang dihang nisulod si Jaca sa Traffic Operations and Development Authority (CCTODA) sa Talisay City.
Nahimo usab siya nga nga usa ka contractual driver sa lungsod sa San Fernando.
Karon, bisan kon mingawon siya sa iyang pagkaboksidor kaniadto, giisip na lang niya nga gibuhat niya ang tanan karon alang sa iyang 14-anyos nga anak, kinsa giisip niya nga inspirasyon.
Tungod usab sa iyang pagkaboksidor, nakapalit siya og house-and-lot sa Barangay Tabunok, Talisay ug nakatabang usab kini sa iyang pamilya sa Sibulan, Negros Oriental. (SunStar Cebu)