SECTIONS
Friday August 17, 2018

Lariosa: Drug personalities ipahibawo?

UYON ang Commission on Election (Comelec) nga angdrug personalities nga naa sa lista sa kapulisan o Philippine Drug Enforcement Agency (PDEA) kon mokandidato sa barangay o Sangguniang Kabataan (SK) elections ipahibawo aron klarong masayran sa katawhan.

Apan alinlangan ang PDEA samtang, buot mobabag ang Human Rights Commission (CHR).

Dunay mga pulitiko nga di sad uyon kay supak sa tawhanong katungod kon way igong pruyba.

Pangutana, unsaon man pagdumpol sa suwab sa narco-politics nga naa na nagharab-harab sa atong bugnong lugaynon.

Kinsa mang pulitiko nga wa makapahimulos sa drug money?

Kuyog ko sa Comelec ning bahina alang sa kaayuhan sa nasod.

Kapait hunahunaon kon mga opisyal sa barangay kadaghanan mga durugista o kaha mga druglord.

Dulom ang ugma sa nasod kay yabagon na ang utok sa mga lider nga anaa sa pundasyon sa pangagamhanan.

Dili na baya husto ang pangisip kon nagumon na sa bisyo sa drugas.

Di ta dinhi alarmist o propeta nga nagbakak kay mao man gyud ni ang kamatuoran nga mahitabo kon di mapunggak ang ulo sa narco-politics nga magasukad sa kabarangayan.

Mga mayor pupasangil lag laban sa tawhanong katungod kay ang tinuod duna silay mga lig-ong kandidato nga naa sa drug business o kaha durugista nga ilang gisaligan sa umaabot 2019 elections.

Kon pagyatak sa tawhanong katungod kay maisip nga pakauwaw maayong atong testingan ngadto sa Korte Suprema hain ang labanan ang ingon niini nga katungod o ang kaayuhan sa publiko.

Di ba kaayuhan man sa katawhan kon di mapili ang mga durugista, drug pusher ug drug lord?

Putlon man kaha nato ang ugat sa narco-politics nga nakabalikis na sa atong katilingban.

Apan kon ipahibawo na, pilion lang gihapon sila sa mga botante monay giingon nga wa gyud tay ayo kay angay lng sa usa ka katilingban sa kasamok, kahugawan ug sa mga maot.


VIEW COMMENTS