SECTIONS
Friday August 17, 2018

Editoryal: BRT, LRT dili kontra

GIKINAHANGLAN na ang dakong kausaban sa sistema sa transportasyon tungod sa nagkagrabeng sitwasyon ma­tag adlaw. Ang publiko nahasol na pag-ayo sa problema sa trapiko. Segurado nga nakaapekto usab kini og dako sa ekonomiya sa Sugbo tungod sa kalangay sa pagbiyahe sa mga produkto o baligya.

Apan unsay gihimo sa atong mga lokal nga lider? Nagsige og lalis kon unsay maayong alibyo. Ang kampo ni Mayor Tomas Osmeña uban sa pipila ka mga oposisyon nagduso sa Bus Rapid Transit (BRT). Sa pikas bahin, ang grupo ni Michael Dino, Presidential Assistant for the Visayas, buot mopatuman sa Cebu Light Rail Transit (LRT).

Si Dino nagkanayon nga dili molampos ang BRT sa dakbayan sa Sugbo gumikan sa kahagip-ot sa dalan ug dako ang magasto ug dugang hasol sa publio ang pagpalapad sa dalan nga rota sa bus.

Apan si Mayor Tomas Osmeña niawhag sa mga Sugbuanon nga dili magpailad sa pangangkon sa kampo ni Dino tungod sa iyang akusasyon nga dili kini sa batid sa natad sa transportasyon.

Ang mayor nibutyag nga dili niya babagan ang plano nga LRT ug iyang giklaro nga way mga Sugbuanon nga magbiyahian kada adlaw gikan sa Danao paingon sa Carcar, vice versa. Dugang sa mayor, ang ubang mahinungdanon nga detalye wala kini moagi makuti nga pagtuon.

Ang BRT ni Osmeña nakasentro lang sa pagsulbad sa problema sulod sa dakbayan sa Sugbo. Apan ang LRT nakatutok sa mas lapad nga dapit sa Metro Cebu. Klaro nga dili magbangga o dili kontra ang duha ka sistema. Pwede mahimong konektado o mahiusa. Nganong maglalis?

Ang klarong rason tungod sa pulitika ug posibling hinakog nga interes sa dakong kuwarta gikan sa proyekto.


VIEW COMMENTS