NAKADAWAT og mga pagsaway si Konsihal Alvin Arcilla human mabutyag nga migamit kini sa iyang City Hall issued vehicle sa pagbisita sa Safari Adventure Park didto sa lungsod sa Carmen niadtong Dominggo. Nag-viral ang hulagway sa iyang sakyanan human kini gi-post sa Facebook nila ni Apas Barangay Captain Ramil Ayuman ug ni Ernest Herrera, kanhi mayor sa Calape, Bohol.
Giangkon ni Arcilla nga na-isyu ngadto kaniya ang sakyanan nga usa ka Toyota Grandia. Ug iya usab nga giangkon nga siya ang nagsakay sa sakyanan uban sa iyang anak ug ang mga barkada niini. Mirason si Arcilla nga miadto siya s maong adventure park kay nag-obserbar sa development niini isip chairman sa committee on agriculture ug sa urban development. Buot ipasabot ni Arcilla nga “nag-lakbay-aral” siya sa maong lugar.
Kinsa may tontohon aning Arcilla? Ilara ang imong lolong opaw ayaw ang mga Sugboanon. Sama sa gilauman, gidepensahan sa “kanhi laos nga pulitiko” si Arcilla gumikan kay iya mang kaalyado sa Bando Osmena Pundok Kauswagan (BOPK). Kon nahitabo pang taga oposisyon ang nakahimo niadto, aw, siguradong grabeng makasaway.
Una, kon miadto si Arcilla sa maong lugar, nganong iya mang gidala ang iyang anak ug mga higala niini? Ayaw kog ingna nga apil sa iyang research ang iyang anak ug mga barkada. Opisyal gyud kaha ang tuyo ni Arcilla sa maong lugar? Unsa man kaha ang posibleng ma-umol niyang ordinansa? Aber, atong huwaton nga aduna ba siyay ma-umol nga ordinansahon nunot sa iyang pagbisita sa maong lugar.
Kining ingon niini ba, klaro nga abuso sa gahum sa pipila ka mga opisyal nga mogamit sa mga sakyanan sa kagamhanan sa dili opisyal nga katuyuan. Klaro man nang nakatatak diha sa mga government vehicles nga “for official use only”. Nag-usik-usik lang sa gasolina sa gobiyerno. Maayo nga ma-imbestigahan kini sa Ombudsman aron ma-disiplina ning mga abusadong opisyal sama aning Arcilla.
(bobbygnalzaro@gmail.com)