NIPATIM-AW na ang abogada nga asawa sa chief of staff ni Kongresista Jonas Cortes sa dakbayan sa Mandaue nga unang gipaalarma sa Facebook account sa bana nga missing sa Miyerkules sa kaadlawon.
Si Atty. Jamaal Calipayan unang nidangop sa station 2 sa Cebu City Police Office (CCPO) niadtong Martes sa gabii aron ipa-blotter ang makaduda nga wala pag-uli sa iyang asawa nga si Sarah Calipayan, 33, usa usab ka abogada nga nagtrabaho sa usa ka kompaniya sulod sa Cebu Business Park, Barangay Kamputhaw sa siyudad sa Sugbo.
Matod sa bana nga katapusan nga ni-text ang iyang asawa sa alas 11:00 na sa gabii ug nasundan kini pagka alas 11:45 nga nagpahibawo nga padung na kining mo pauli.
Dinhi na nagsugod ug kahadlok ni Jamaal sa dihang naabot nalang ang ala una gahapon sa kaadlawon wala pa mauli si Sarah nga unta 30 minutos ra ang kasagaran nga gidugayon makaabot na kini sa ilang panimay.
Ala una pasado ni-text na usab ni apan didto na sa numero sa iyang inahan nga nagpadulong na kini nga misangpit sa ilang tinawgan.
Nagtuo siya nga dili na ang iyang asawa ang naghawid sa cellphone sanglit dili kini mo-text sa iyang inahan nga mosangpit sa ilang tinawganay.
Tungod niini, iyang gitawagan ang numero sa cellular phone niini apan i-drop kini.
Pagka ala 1:30 sa kaadlawon iyang giusban sa pagtawag apan dili na kini ma contact nga gituohan nga gipawong ang telepono.
Nabalaka na
Nagduda na si Jamaal nga adunay dautang nahitabo sa iyang asawa nga maoy hinungdan nga siya na mismo ang miadto sa opisina niini alas 2:00 sa kaadlawon.
Gipahibawo siya sa gwardiya sa building nga milakaw na ang iyang asawa sa alas 6:28 pa sa gabii ug wala nay tawo sa iyang opisina.
Sa kahadlok nga aduna nay nahitabo sa iyang asawa dinhi na nangayo ug panabang si Calipayan uban ni Congressman Cortes sa mga sakop sa Station 2.
Gipaalarma kini niya sa Mobile patrol ang sakyanan sa iyang asawa nga Honda City nga kolor urban titanium nga adunay plate number FHY 588.
Awto nakit-an
Apan pasado alas 8:00 gahapon sa buntag napalgan nila ni Cortes ug Calipayan ang sakyanan sa abogada sa parking lot sa Banilad Town Center. Dali nga gisusi sa kapulisan ang sakyanan.
Matod ni Jaamal, wala sila mag-away ni Sara apan ning bag-o lang mipahibaw ni kaniya nga mi-resign na siya sa trabaho sa rason nga wala na kini ganahi.
“I don’t know siguro sa work load sad kay siya ra usa kay bag-o pa sila napun-an ug new lawyer diri sa Cebu before ana for more than two years siya ra usa nya Visayas and Mindanao ang cover,” matod ni Jaamal.
Misis mitunga
Apan samtang nagpadayon ang gihimong pagsusi sa kapulisan ug sa padayon nga paghinabi sa mga sakop sa media sa pagkuha og dugang impormasyon ngadto sa mga pulis, kalit nga niabot si Sarah sa BTC alas 11:50 sa buntag nga daw sa wala ray nahitabo.
Tungod sa kalipay sa bana, iyang gigakos si Sarah ug nagdungan sila og sulod sa van nga iya sa pamilya ug naghinilakay.
Si Chief Insp. Maria Theresa Macatangay na ang miatubang sa mga tigbalita ug mipahibawo nga giingong nahubog ang abogada nianang gabii ug mas gipili niini nga matulog nalang sa usa ka hotel duol sa BTC ug iya kining gihulagway nga anaa sa intense depression.
Una nang gitug-an ni Sara nga nag-antos sa anxiety o kanunay nga kabalaka nga stressed kini sa iyang trabaho isip senior manager sa legal department sa Filinvest. Sa niaging semana pa unta kini nihatag sa iyang resignation letter, apan wa una tugti nga mopahawa, hangtod nga makakita og puli.
Pasaylo
“I would like to sincerely thank everyone of the 4,500 people who shared the post I made earlier when my wife disappeared. I am a worrier and its my fault it has escalated but the circumstances warranted that I do everything in my capacity to find the love of my life. I would like to think that any man who loves his woman and vice-versa would have done the same..” tipik sa post sa Facebook account sa bana.
“Since I was the one who went public with this, I hope whatever criticism shall be thrown my way for whatever inconvenience it has caused you. Please do not blame my wife. She’s been through enough and she could use a little positivity rather than trolling from any of us,” dason ni Jamaal sa iyang Facebook post.
Ang giluwatan nga apology sa bana nagtapos sa isyu ug nagsira sa imbestigasyon sa kapulisan bahin sa kaso nga nabaniog sa publiko.