SOBRA tunga sa milyon nga kantidad sa shabu ang nasakmit gikan sa motorela drayber niadtong Martes sa Purok 11, Baloy Tablon, dakbayan sa Cagayan de Oro.
Ang suspek naila nga si Abdul Mocsara, 51, minyo, residente sa nahisgutang dapit ug gikonsidera nga high-value target (HVT).
Sa pakighinabi sa SunStar SuperBalita kang Police Chief Inspector Ramsis Cartagena, hepe sa Police Station Zamboanga Peninsula (PS9) sa Macasandig, gibutyag nga napalitan sa ilang tropa uban sa Philippine Drug Enforcement Agency (PDEA) ang suspek hinungdan sa pagkasikop niini.
Giingong klase-klase ang mga parokyano sa suspek labi na kagabhion ug giingong frontline lamang niini ang pagmaneho og motorela aron nga dali nga makasulod-sulod sa mga dapit.
“Dili pa sad ingon nga dugay na kaayo ni atong na monitor bale sa atong surveillance naa gyu’y gasulod sa iyang area mao atong gi-conductkan og test buy para ma confirm, lain-lain man gud na iyang parokyano labi na og magabii, bale murag front line ra niya iyang pag drive para maka sulod sulod siya bisag asa,” pahayag ni Cartagena.
“Pusher gyud siya, dinagko gyud iyang pagbaligya,” dugang niini.
Samtang sa bahin sa suspek, hugot nga gipanghimakak niini ang alegasiyon gumikan ug niingong nga motorela driver lang siya ug wala kini nalambigit sa ilegal nga druga.
Giangkon niini nga nigamit kini kaniadto sa ginadiling shabu apan dugay na nga mi-undang.
Nakuha gikan sa posisyon sa suspek ang duha ka mga dagkong pakete sa shabu nga aduna’y gimbug-aton nga 155 gramo nga gibana-banang nagkantidad og P600 mil lakip na ang drug bust money nga P4 mil ug drug bust item nga 5 ka gramo sa ginadiling druga.
Samtang padayon nga naghangyo ang kapolisan sa mga gagamit sa ilegal nga druga nga mohunong na niini.
“Posible naa pa gyud kay naa paman ta’y ga supply ug wala na’y ga supply wala na gyu’y ga use kay wala na ma’y gapamaligya,”pahayag ni Cartagena.
Ang suspetsado ang kasamtangang anaa na sa mini-cell sa PS9 sa Macasandig alang sa pag-atubang sa kasong pagpamaligya sa illegal nga druga diin posibleng wala kini piyansa.