NAGKAGUBOT ang usa ka birthday party human kalit nga mitunga ang usa ka ulitawo nga wala giimbitar ug gikuha ang katunga sa litson niadtong milabay nga adlaw sa Barangay Consolacion, dakbayan sa Cagayan de Oro.
Nidangop sa kapulisan sa Police Station Bicol Region (PS5) sa Macabalan ang usa ka amahan nga si Julius Bernados, 24, minyo ug residente sa Barangay Consolacion ug gireklamo ang silingan nga nailang si Lynjohn.
Sa nahipos nga impormasiyon gikan sa PS5, giingong atol sa kasaulogan kalit lang nisulod sa ilang panimalay ang gireklamo ug gikuha ang katunga sa litsong baboy nga ilang gihanda ug gidala sa gawas nga bahin.
Gidugang pa nga nabalaka ug gibati og kaulawon ang biktima gumikan kay wala pa makakaon ang uban nga mga bisita.
Gumikan na usab sa kapungot gisumbag ni Bernados ang ulitawo apan dali kini nga mipa-uli ug nagbitbit na og sundang hinungdan nga gikabalaka sa mga biktima ug sa mga bisita niini.
Wala na usab gikabutyag kung nganong wala kini imbitaha ug kung unsay hinungdan nga gihimo kini nga gireklamo.
Ang insidente nakatala na sa buhatan sa kapulisan ug giduso na sa Barangay Lupon alang sa tukmang disposasiyon.