WALA pa gani magsugod ang official campaign period alang sa barangay ug Sangguniang Kabataan (SK) elections nga gikatakda karong Mayo 14, subsob na ang kampaniya sa ubang mga gustong mokandidato. Aw, kon buot lang huna-hunaon hagbay ra silang nangampaniya human nasuta nga madayon ang eleksiyon. Gani niadtong miaging buwan na sila nagsugod og pulong-pulong, magpa-ila sa mga botante nga sila mokandidato ug moserbisyo.
Walay nahimo ang Commission on Elections (Comele) aron maakusahan sila og premature campaigning ug electioneering. Wala man gani mahimo ang Comelec aning political parties ug mga pulitiko nga dayag kaayong misuporta aning mga mokandidato. Dinhi sa dakbayan sa Sugbo, ang Barug-PDP Laban, nanghambog na nga ilang makontrolar ang umaabot nga barangay elections. Sa ilang panglantaw modaog sila og mga 65 ka mga barangay captains sa 80 ka mga barangays.
Aw, kon gihimo kini sa taga Barug-PDP Laban, labaw pa kining gihimo sa taga Bando Osmena Pundok Kauswagan (BOPK). Kini pagpangandam sa mga pulitiko nga mi-back up sa mga kandidato sa barangay sa sunod tuig nga eleksiyon kon sila na usab ang magpapili. Away gihapon kini sa BOPK ug Barug-PDP Laban. Labi na unya kon magpili na og presidente sa Association of Barangay Councils (ABC), kinsa molingkod isip ex-officio member sa konsiho.
Labi pa karon kay ang BOPK nagkinahanglan og igong numero sa konsiho kay dehado man sila sa gidaghanon batok sa oposisyon. Ang SK usab dali ra kaayong kontrolahon. Ang SK federation president molingkod gihapon sa konsiho isip ex-officio member. Ang boto sa ABC ug SK presidents pareha og boto sa mga elected councilors.
Mogasto gyud ning political parties ug pulitiko kay ila man nga magamit ang mga modaog. Asa man pod magyangongo ang mga kandidato sa funding? Aw, natural sa mga pulitiko nga mi-back nila. Ang taga BOPK adto sa City Hall. Ang taga Barug-PDP Laban ni Vice Mayor Edgardo Labella nga mosandig pod ngadto ni Presidential Assistant for the Visayas Michael Dino. Problema na na ni Dino asa pod siya mangita. Mao na ang pulitiko.
(bobbygnalzaro@gmail.com)