NABANTOG ang isla sa Siquijor sa mga maanindot nga talan-awon sama sa mga karaang simbahan, waterfalls ug nindot nga dagat.
Di lang ilado ang isla sa mga pagpanambal apan sikat pud kini nga destinasyon di lang sa mga lokal apan lakip na sa mga langyaw nga turista.
Kon hilig ka nga magpa-tan sa beach, adunay pampublikong beach nga di nimo angayang palabyon kon ikaw mobisita sa Siquijor.
Kini mao ang Paliton Beach sa may Barangay San Juan sa isla.
Way entrance ang Paliton Beach apan ang bas niini, susama sa kaputi sa bas didto sa Boracay.
Kon gusto ka moadto sa Paliton Beach, mahimo kang mosakay og traysikol gikan sa lungsod ug ihatod ra ka sa drayber sa dapit, ang plte anaa sa P120 sa duha ka tawo ug inyo na kini maabot sud sa 30 minutos.
Wa kay angayang kabalak-an kon motaak ka sa isla sanglit ang paghatod sa mga turista sa mga dapit, fixed rate man kini nga nakabutang ang presyo sa gamayng billboard duol sa pantalan.
Mas maayo nga magdala mo og kaugalingong tent o duyan kon moadto kamo sa Paliton Beach aron duna moy laing kapasilungan gawas sa mga kahoy ug punuan sa lubi.
Giawhag sab ning tigsuwat nga magdala mo og kaugalingon ninyong tubig ug pagkaon tungod kay medyo layo ang tindahan sa dapit.
Nindot ang dapit alang sa buot mag-day camping apan di advisable ang pagpabilin dinhi kon gabii sanglit wa man kini mga suga ug lifeguard nga mobantay.