DILI na bag-o natong mga Pilipino ug daan na kitang nasayod sa mga nagkadaiyang gimik sa politiko ug sa mga tawo nga gustong magpapili sa matag eleksyon.
Kay panahon man karon sa Sangguniang Kabataan (SK) ug Barangay elections, manggula na sab ang mga gimik, gikan sa pagbinayranay ngadto na sa paghatag og mga pagkaon -- kining tanan gitawag nga "kinamangay" diin bugtong sa panahon lamang sa eleksyon mahitabo.
Gani kung panahon na sa kampanya, maabot tawon ang politiko bisan asa, bisan guot ang agianan, sudlon gayud, makalamano lang sa tagbalay.
Bisan sa ilang mga poster, plastik kaayog nawong, hastang tingsi ug grabeng pa-cute, pero sa personal diay, nagmugtok lang ang nawong labi na'g manginahanglan naka sa ilang tabang kung sila anaa na sa gahum.
Pero, ayaw ka, kay di pod tawon tanan, naa say mga politiko nga ligdong gayud ilang panerbisyo, motabang gayud sa katawhan; pero kini, sa usa ka gatus, maayo lang og dunay duha kabuok ang nabilin.
Salikwaot kining paminawon kay reyalidad man gyud kini panahon sa piniliay, sa laktod pabagaay lang og nawong, kay paghuman sa eleksyon, mobawi naman ni sila kay manago naman.
Sa SK sab, pa-pogi ug guwapa points gyud ang kasikas ani, ug sagad sa mga midagan niini, kadtong mga hitsuraan nga mga bagets diha sa barangay, panid-i ra god ninyo, di ba, wa gyud ko masayop.
Unya, giingon baya nga unsaon manang ka-guwapa ug ka-guwapo kung way sud ang utok? Pero miingon man pod ang usa nga, "pa-flower flower lang god na sila, di bitaw na sila gihapon molihok sa mga programa sa kabataan sa barangay pag-abot sa panahon."
Pero sa gika-ingon ko na, di baya sab tanan ha, di gyod tanan ingon niini, naa pa'y duha ka porsiyento nga nabilin, apan subo gihapon.
Bisan unsaon nato og balanse ug analisa kinsay maayong i-boto, di gyud kasaligan ang mamahimong desisyon human wa ta masayod nga mayabag gyud sila abot sa panahon human sa piniliay.
Karong panahona, mas maayong gawas sa atong gisaligan nga kandidato, motabang usab kita kanila sa pagpakabana sa palibot kung anaa na sila sa puwesto -- motabang kita, aron mamahimo sab silang kugihan.
Karong Mayo 4, 2018 naman diay ang unang adlaw sa kampanya, busa good luck sa mga kandidato ug unta mopatigbabaw sa atong mga kasingkasing ang gugma, di lamang sa kaugalingon apan ang paghigugma diha sa panerbisyong tinuod-anay.