IMPRESIBONG gipakita sa Northern Mindanao Regional Athletic Association (NMRAA) basketball teams karong tuiga atol sa 2018 Palarong Pambansa niadtong Miyerkules sa Vigan, Ilocus Sur.
Kini, human sulod tanan pambato sa NMRAA sa secondary boys ug girls ug elementary boys ngadto sa quarterfinals sa ika-tulong adlaw nga aksyon sa prestiyusong Palaro.
“Dakong kausaban karon sa NMRAA basketball kay tanan tulo sulod sa quarterfinals sa kadalaing kategoriya,” ingon ni NMRAA elementary boys head coach Rene Ilogon.
Parehas ang tulo nahuman sa ikaduhang pwesto sa ilang kadalaing kategoriya diin wala kini nabuhat niaging tuig.
Nakuratan ang tanan nga walay tatsa ang NMRAA secondary boys ni coach James Racines sa unang tulo ka dula bag-o pa man naparot sila sa kataposan nila nga tahas batok sa Calabarzon.
“It’s ok as long as we are still fighting for honors. Positioning nalang to’ ang amoa,” ingon ni Racines, kinsa naila sa iyang pag-coach sa Assumption Montessori School (AMS) Jaguars.
Igo lang nakatungtong ang NMRAA elementary boys ni coach Rene Ilogon pag-abante sa quarterfinals human mihuman og 2-1 win-loss record.
Gilat-an nila ang Cordillera region sa unang dula, bago pa man nahatdan ang batos ni Ilogon sa ilang unang kapildehan kontra sa Central Visayas atol sa ilang ika-duhang dula.
Apan, niabante sila sa quarterfinal human giparot nila ang Mimaropa sa ikatulo ug kataposan nila nga dula sa elementary division.
Parehas ang NMRAA secondary ug elementary boys nga maatbang ang Western Visayas diin gidula kagahapon.
Sulod sab ang NMRAA secondary girls ni coach Agustin Yasay sa ikaduhang pwesto sa ilang bracket aron moaway sa semfinal batok sa Central Luzon.