GIPASLAK sa selda sa San Pedro Police Station ang usa ka ulitawo human iyang gibira ang misiwil nga panty sa dalaga atol sa ilang disco party.
Nahitabo ang insidente alas 12:10 sa tungang gabii niadtong Lunes sa usa ka balay kalingawan sa Palma Gil St., Barangay 3-A, siyudad sa Davao.
Usa ka alyas “Maricar,” 21, dalaga, nagpuyo sa Bacaca Road, Barangay 19-B Poblacion, ang mireklamo sa kapulisan human siya gi-amung-amongan ni alyas Ricky, 21, taga Bryco, Barangay 5-A Bankerohan, ning siyudad.
Sa impormasyon nga nakalap sa Sun.Star SuperBalita gikan mismo kang Ricky nga wa na siya kabalo sa iyang gihimo gumikan sa iyang kahubog.
"Nahubog naman mi mao nga wa na ko nakabalo," sulti ni Ricky kinsa miangkon nga natintal siya, "Alangan naman nga seksi man pod kaayo, naka-pencil lang siya."
Dugang niya nga di niya madawat ang maong pasangil labi na kay misulti si Maricar nga gisulod ni Ricky ang iyang kamot ngadto sa iyang bilahan.
"Kana, di ko motuo ana nga gisulod nako akong kamot, kay wa gyud na mahitabo. Basta nasaghiran ra nako siya dapit sa panty, sa may sampot," dugang saysay ni Ricky.
Bisan pa man sa katarungan sa suspek, desidido gihapon nga mopasaka ang babaye og kasong unjust vexation ngadto sa korte batok sa suspek.
Giandam na ni Police Officer 1 April Mandi sa Women and Children's Protection Desk ang kaso batok sa maong lalaki kagahapon.