ADUNAY bag-ong kamandoan ang Land Tranportation Office (LTO) Northern Mindanao ngadto sa mga bout molukat sa student permit ug driver's license.
Nanawagan si LTO Assistant Regional Director Nelson Manoloto sa katawhan nga bout molukat og student permit ug driver's license nga aduna na silay bag-ong gidugang nga rekisitos.
Gipasabot niini nga ang rekisitos nga gidugang alang sa maglukat og student permit (SP) nga lisensya mao ang medical certificate uban sa authenticated nga birth certificate. Kaniadto birth certificate lamang ang ilang gipangayo apan gimando sa kaulohan nga gikinahanglan na ang medical certificate.
Samtang ngadto sa professional driver's license gipangayo ang NBI clearance, Police Clearance, ug Medical Certificate ug ingon man authenticated nga birth certificate.
Gipasabot ni Manoloto nga importante kini nga mga rekisitos sa usa ka tao nga maghupot og driver's license.
Giklaro usab niini nga giwala na nila ang medical certificate nga ekslusibo lamang sa licensed pyhsician gikan sa ilang buhatan tungod kay mahimo na nga molukat og medical certificate ang bisan kinsa basta pirmado sa usa ka lisensyado nga doktor.
Dugang panawagan ni Manaloto nga sugod sa adlawng Biyernes hangtod Sabado dili usa sila makapalukat og lisensya sa mga kostumer tungod kay adunay maintenance nga gihimo ug balik kini sa umaabot adlawng Lunes, Nobiyembre 23. (SVB)