ADIK nga gituohang nawad-an sa maayong pangisip napusilan patay sa usa ka pulis dihang nag-amok alas 6:10 sa gabii niadtong Miyerkules sa Barangay Sta. Cruz, Ronda, Sugbo.
Si Jolito Marabilles, 35, dunay kapuyo, dead-on-arrival (DOA) sa Barili District Hospital tungod sa samad pinusilan sa iyang walang abaga, tiyan, ug walang tuhod.
Nakapusil kaniya mao si PO2 Virgilio Villamor sa Ronda police, kinsa usa sa mga pulis nga ningtubag sa alarma.
Si SPO2 Emerito Sansan, imbestigador sa Ronda Police Station nga nahinabi sa Sun.Star Superbalita, nagkanayon nga mga alas 3 sa hapon niadtong Miyerkules nag-wild si Marabilles.
Ang iyang nga si Erlinda, mga iyaan, paryente ug barangay officials unang ningpakalma kang Marabilles, kinsa nagdalag pinuti.
Nagbadhas siya sa karsada, nagsigig panghasi kay gusto siya mopatay og tawo.
Nagtuo ang iyang pamilya nga siya naburyong sa pagsigeg suyop og shabu samtang nag-estar sa dakbayan sa Sugbo.
Pagka-alas 4:30 sa hapon, nisamot sa pagkabayolente si Marabilles, nitigbas sa manok hiniktan sa iyang paryente hinungdan nga nanawag sila sa kapulisan.
Ningresponde sila si PO3 Pepo Ansag ug PO1 Joavie Tomarse ug maoy nisuway pagpakalma kang Marabilles.
Apan mga alas 5 sa hapon, nangayo silag back-up kay nisamot sa pagkabayolente ang suspek.
Niapas si PO2 Virgilo Villamor, kinsa uban ni Erlinda, inahan sa suspek, nipakalma kang Marabilles.
Inay mokalma, gitigbas sa suspek ang iyang inahan apan wa maigo ug nakadagan.
Ningduol kang Marabilles ang iyang mga paryente, apan iya usab gisuwayan sa pagtigbas.
Sila si Villamor nialirong kang Marabilles.
Iyang giatake si Villamor, kinsa nagsige og lihay sa mga iyang mga pagtigbas.
Dihang nakita na ni Villamor nga apeke na siya ug nag-ungaw sa kakuyaw ang iyang kinabuhi, iyang gipusil si Marabilles.
Ang suspek naigo sa likod sa iyang wala nga abaga ug nilapos ang bala sa tiyan.
Bisan kon samdan, isog gihapon kini hinungdan nga giusban pagpusil gamit ang 9mm pistol tumong sa paa.
Dihang nalup-og na si Marabilles, dali nilang gidala sa ospital sa Barili apan DOA.
“Nagbadhas siya sa karsada. Nangitag patay nagdalag sundang. Isog kaayo sa tama to sa drugas. Unya gidala-dala niya ang manok hiniktan nga gitigbas unya iyang gimulbulan,” dugang ni Sansan.
Si Erlinda nibutyag nga niadtong miaging adlaw, ilang gidala ang iyang anak sa Vicente Sotto Memorial Medical Center (VSMMC) kay was a kaugalingon.
Kay outpatient ra sila, gipapauli sila sa doktor human maresitahi ug mapainom og tambal.
Sa wa pa nila madala sa ospital, nanghulga si Marabilles sa iyang pamilya nga pamatyon hinungdan sa ilang kabalaka, ang kapuyo ni Marabellis, uban sa duha ka gagmayang bata gipalarga nila sa dakbayan sa Sugbo.