ANG Bureau of Internal Revenue (BIR) sa Davao Region mikandado kagahapon sa walo ka mga establisemento sa rehiyon, pito niini ania sa Davao City, samtang ang laing usa anaa sa Mati City, pinaagi sa Oplan Kandado Program.
Si Simplicio Cabantag Jr., ang bag-ong Davao City revenue district officer sa 113 West district, nagsulti nga kining mga kompanyaha nga gipanag-iyahan ni Arnold Fontilla dunay business name nga “Jeying General Merchandise” nakalapas sa Republic Act 8424 kun Tax Code of 1997.
Matud ni Cabantag nga ang maong kompanya, nga ubos ang deklarasyon sa 90 porsiyento sa ilang kita, wa mihatag og opisyal nga resibo ug naghatag lang og di rehistradong resibo sa mga kustomer.
“The Jeying General Merchandise failed, refused and neglected to comply with the requirements specified in five days Value-added Tax (Vat) compliance Notice No. 19152 and the 48-hour notice released by BIR,” sulti ni Cabantag.
Usa sa pito ka mga establisemento sa Davao City nga gisirhan mao ang sangang tindahan sa Jeying General Merchandise, ang 8.PO General Merchandise nga nahimutang sa DCLA, Ramon Magsaysay Avenue, Davao City.
Ang Jeying General Merchandise adunay VAT liability nga kapin P1 million.
Aduna kini kapin 90 porsiyento nga under-declaration rate nga kung sumadahon mokabat sa kapin P5 million.
“Under the law, these establishments will be closed for about five days and it will continuously be closed if they will not pay their Vat liability, it will only be lifted once these companies comply with their obligations,” sulti ni Cabantag.
"Surveillance will be ongoing all over the region," dugang niya.
Ang BIR maghimo usab og post-checking sa pagtuman sa malapason sa balaod sa pagbuhis.
Si Cabantag midugang nga ilang irekomenda nga daghan pang establisemento ang sirhan tungod sa paglapas sa Tax Code pinaagi sa ilang Oplan Kandado Program.
Ilawom sa Oplan Kandado Program, ang operasyon sa negusyo masuspenso ug temporaryong sirhan sa BIR sa mosunod nga hinungdan: kapakyas sa pag-file sa value added tax (VAT) return; ubos nga pagdeklarar sa buluhisan nga kita sa 30 porsyento o sobra sa tukma nga kantidad sa kaso sa VAT-registered o registrable taxpayer; o kapakyas sa pagrehistro.
Si Cabantag usab nagsulti nga subay sa ilang koleksyon misobra sila sa 25 porsyento nga tax collection tungod sa ilang pagpatuman sa programa sama sa Oplan Kandado, ug Run Against Tax Evaders, ug daghan pa.