HATAGAN una og higayon sa Department of Health (DOH) 7 ang kadagkuan sa Vicente Sotto Memorial Medical Center (VSMMC) nga mohimo og kaugalingong imbestigasyon kabahin sa hitabo sa usa ka inahan nga naapil og hiwa ang iyang pantog dihang gi-caesarean.
Kini human hingpit nang nakaduso og pormal nga reklamo ngadto sa ahensiya ang 23-anyos nga si Jermelyn Bactismo pinaagi sa iyang kapuyo nga si Leonard Parantar.
Matod ni Ligaya Moneva, tigpamaba sa DOH 7, nga ila nang gi-forward ngadto sa VSMMC ang letter of complaint nga gipadangat ug pinirmahan ni Parantar.
Giklaro ni Moneva nga ang aspeto lang sa licensing ug regulation lang mahimong manubag ang tambalanan sa ilang buhatan, apan sa bahin sa medical malpractice, ang Professional Regulations Commission (PRC) ang dunay hurisdiksyon niini.
Ila pa usab nga paabuton ang mga rekomendasyon sa VSMMC sa higayon nga mogawas na ang resulta sa imbestigasyon una sila morekomendar sa pag-umol og fact-finding investigation.
Samtang si Dr. Antonio Paradela, chief of professional medical clinics sa VSMMC, sa dihang gikuhaan og komento labot sa mao nga isyu, igo lang nipahibawo nga duna nay giumol nga komitiba ang ospital nga maoy niimbestigar sa reklamo. Wa siya motugot og interview sa mga sakop sa media.