KIDAPAWAN CITY -- Madugangan og 550 Megawatts ang suplay sa kuryente sa Mindanao Grid kon makonekta na ang upat ka coal fired power plants sa tuig 2016.
Matud ni Electric Power Industry Management Bureau science research specialist II Noriel Christopher Reyes sa Department of Energy (DOE), ang upat ka coal-fired power plants makatabang og dako aron makunhoran ang epekto sa nasinatiang El Niño nga maoy hinungdan sa nag-unang problema sa Agus ug Pulangi hydropower plants.
Matud ni Reyes nga duha sa upat power plants ang magsugod na sa ilang operasyon sa first quarter sa 2016 nga langkuban sa planta nga gipanag-iyahan sa Therma South Incorporated sa Binugao, Toril, Davao city nga dunay 150 MW nga power supply sa Mindanao grid, ug ang 100 MW coal-fired power plant sa Sarangani Energy Corporation sa Maasim, Sarangani Province.
Sugdan sab San Miguel Power Corporation ang operasyon sa ilang duha ka power plants sa 2nd quarter sa 2016 nga mohatag og 300 MW power supply sa Mindanao Grid.
Samtang gituohan sab sa mga opisyal sa DOE nga mas grabe ang epekto sa El Niño sa power sector sugod Nobyembre 2015 hangtud Pebrero 2016, kon diin kulangon og 100 hangtud 200MW ang tibuok suplay sa enerhiya ang Mindanao.
Sa North Cotabato ug Kidapawan City, nakasinati na og duha hangtud tulo ka oras nga pagkawala sa suplay sa kuryente gikan sa Mindanao Grid.
Nanghinaut ang katawhan sa Mindanao nga kapangitaan og pamaagi o solusyon sa gobyerno ang krisis sa enerhiya. (EEF)