ANIA koy nadawat nga reklamo pinaagi sa email gikan sa atong usa ka suking bumabasa nga magpakabana sa atong mga igsoon diha sa Mango Square nga matod pa gipangkilkilan sa mga sakop sa Fuente Police Station nga modakop kanila. Gikan kini sa usa ka nagpa-ilang Boyax. Dili lang nato ibutyag ang iyang pangalan og email address kay polis ra ba ang gireklamo. Manghulga ra ba dayon ning mga pulis.
“Tugoti nga akong ipadangat kanimo ang mga reklamo sa mga ambulant cigarette vendors diha sa may Mango Square. Duha na kahigayon nga nanakop ning grupo ni PO1 Ricafort sa mga cigarette vendors diha sa Mango Square matag gabii ug ilang dad-on sa Fuente Police Station ug pamultahon og tag P500 matag usa kanila. Unya gulaton pa nga kon dili mobayad sa multa, butangan kuno og laing kaso sa hantak ug kanang Section 11. Mao nga mapugos intawon sila pagbayad. Pito ni sila kabuok nga gipabayad. Ang pangutana nako kon ugaling nakalapas man sila sa balaod isip cigarette vendors, unya gipamulta ug P500, asa man padulong ang multa nga wala man mo-issue ug official receipt ang mga pulis nga midakop kanila? Maayo ra ba kaayo mogulat kini si PO1 Ricafort nga iyang patungan ang kaso ug hantak or Section 11 kon dili mobayad. Maayo unta nga imo kining magtagad, Sir Bobby, aron mahunong kining maong binoang sa mga pulis. Willing o andam kaayo ang maong mga cigarette vendors nga mo-atubang kon aduna may imbestigasyon.”
Advise
Wala nako i-delete o omit ang pangalan ni PO1 Ricafort aron gyud adunay igong basihanan ang iyang labaw nga mo-imbestigar niini. Kay aron pod dili maduhig ang ubang mga pulis nga nadestino sa maong presento. Nasayod ko nga manghimakak gyud si Ricafort niini. Puwede pod siya nga mosuwat kanato aron makuha pod nato ang iyang side. Kay kagahapon sa wala pa nako gitagik kining maong lindog, ako siyang gipapangita ni Super Guam Logronio sa dySS Super Radyo news ug sa Superbalita para kuhaan sa iyang habig. Kay basin og tumo-tumo ra pod ni. Pero wala man daw makontak. Ako pod gitexsan si Chief Inspector David Senor apan dili naman diay siya ang hepe sa Fuente.
Pero para opisyal gyud nga mohimo og lakang ang mga kadagkuan sa kapulisan, labing maayo, mo-execute of affidavit kining mga nireklamo. Diri sa media, dili man opisyal nga reklamo. Makakomentaryo ta pero dili man makadisiplina kining atong komentaryo ug kon magpabaga gyud sa ilang nawong kining maong mga pulis. Gikinahanglan mobarug gyud sab ang mga nireklamo. Mapitol lang ning maong klase sa binoang kon adunay mangahas pagbarug. Mao ra na.
(bobby@sunstar.com.ph)