Manag live-in nga gisikop sa NBI tungod sa cyber porn gikiha na

KASONG qualified human trafficking ug child pornography ang gipasaka sa National Bureau of Investigation (NBI)7 batok sa mag-live in partner nga nadakpan tungod sa giingong pagamit og mga menor de edad alang sa cyberporn operation.

Matod ni State Pro­secutor Mary Anne Demano nga mao kini ang mga kaso nga gipasaka batok kang Irene Diloy, 18, ug sa iyang kapuyo nga si Johnson, 23.

Ang duha ningdumili sa pagpa-interview sa mga reporter dihang kuhaan unta sa ilang habig.

Ang duha giingong naggamit og cellphone hinungdan nga lisod i-trace sa mga lokal nga awtoridad tungod sa kakuwang sa training ug kahimanan.

Alang sa NBI, lig-on ang mga kaso nga ilang gisang-at batok sa ma­nagkapuyo nga ilang nasikop, kay gitudlo sila sa mga bata nga maoy ilang gigamit sa ilegal nga kalihukan.

Matod ni NBI7 assistant regional director, Atty. Erik Isidoro, pahubuon sa duha ang mga bata ug kuhaan nila og video o hulagway gamit ang cellular phone.

Nag-edad og 5 ngadto sa 11 anyos ang mga biktima, nga anaa na sa kostudiya sa Department of Social Welare and Development (DSWD).

Ang operasyon sa NBI niadtong Sabado nagmalampuson tungod sa abag sa Homeland Security sa Amerika nga ni-coordinate sa NBI-Anti Human Trafficking Division.

Sigun ni Isidoro, kuwang ang kahimanan ug training sa NBI ug bisan sa kapulisan aron ma-trace ang mga cyberporn ug cybersex operation ga­mit ang cellphone.

Gawas niini, anaa pa ang anti-wiretapping law nga nag­dili pag-record sa mga transaksiyon sa telepono.

Gawas sa positive i­­­den­tification sa mga ba­tang biktima, ang 18-an­yos nga si Diloy sus­pek niangkon nga gi­pa­himo niya og malaw-ay ang mga bata sa internet tu­ngod usab sa sayon ug dako nga kita niini.

Kauban niya nga gidakop ug gitanggong sa NBI ang iyang 23 anyos nga lalakeng kapuyo.

Ang ronda sa NBI nakapakugang sa mga barangay official nga niangkong wa sila masayod nga naa pa diay cyber porn sa ilang dapit human ronda­ha niadtong 2011.