PANAHON sa bakasyon ug panahon sa panggawas o "outdoor" nga kalihukan. Init sab kaayo sa balay busa mas gustuhon pa sa kabatan-onan ug kabataan nga mogawas aron magdula. Kalimtan una ang malaporselanang kutis kay di malikayang mabulad sa init.
Ang uban nagyampungad sa beach resorts ug swimming pool aron motampisaw sa mabugnaw'ng tubig.
Ang uban didto nagdasok sa malls kay bugnaw ug hayahay sa pamati. Kung gutmon ug uhawon daghang mapalit sa sulod. Kung gilaayan kay way gibuhat naay sine nga matan-aw ug dulaan sa mga bata.
Siyempre sa mga parehas natong way kuwarta, magmantiner na lang og window shopping dala ang pag-exercise sa lutahan ug hawak nga gitay-an na. Usahay maka-jackpot kay naay promo nga libreng tilaw og noodles, bino, juice, beef loaf, cake, kape ug uban pa. Dawaton hasta ang papel nga may pahumot pang-alkontra sa baho sa kagwang inig bulad sa adlaw.
Naay promo sa usa ka kompaniya nga namaligya og katre ug foam sa dagkong malls sa Korea nga puwedeng matulog ang customer. Apil kini sa ilang taktika sa pag-agni og customer nga mopalit sa ilang produkto ug ang nangatulog nga customer sa ilang katre ug kutson maoy model nila. Naa lay nakaparat kay niabuso ang ubang customer kay magpirmi na man hinuon sa mall aron lang matulog imbis nga mamalit.
Libre na ang hunol-hunol nga kutson ug aircon nga mora'g nakadaug og Lotto. May uban pang Nanay nga natulog kauban ang ilang gagmay'ng anak.
Sa dihang kaihion na ang bata, nikuha'g plastic nga supot ang Nanay ug gipaihi ang bata nga nagtindog sa katre sa mall. Pagkahuman gipadaplin sa babaye ang plastic unya nagpadayon og hagok.
Wala makaantus ang kompaniya sa katre ug foam busa gihunong ang promo ug gidid-an na kining buhaton sa malls didto.
Uso sab karon ang hiking, fun-run ug biking.
Niadtong niaging weekend, nagpahigayon og fun run ang Tuburan Institute ug ubang mga NGOs isip fundraising aron matukod ang eskuwelahan sa Tuburan didto sa Tugbok District.
Ubay-ubay ang niapil ug pagkahuman nananum pa sila'g kahoy sa lugar diin tukuron ang maong eskuwelahan.
Nindot kining ilang pinasahing paagi sa pagtungha sa bata ug duna kining eskuwelahan diha sa Barangay Indangan ning siyudad.
Nikusog sab ang grupo sa mga siklista nga nagduso og maayong lifestyle ug pagtubag sa problema sa climate change ilabi na ang pagsulabi og gamit og lana nga gikan sa "fossil fuel" sa ilawom sa kayutaan.
Mas kusog ang maong grupo sa kaulohan diin ilang gikampanya ang pagpasar og mga balaod nga pabor sa mga siklista ug paggamit og bisikleta sa inadlaw-adlaw nga kinabuhi sama sa pagmuntar og "bike lanes" aron sayon ug luwas ang ilang pagbiyahe.
May kampanya pa sila alang sa hustisya sa usa ka siklista nga namatay kay naatrasan ug naipit sa jeep.
Dinhi sa Davao aduna nay Bike Lane Ordinance nga kung wa ko masayop giduso ni kanhi konsehal Pete Laviña apan hangtud karon wa pay makitang bike lane sa atong dalan.
Sige hinay-hinay lang ug unta luwas ang atong mga kalihukan sa bakasyon.