DAGHAN na seguro ang nakabisita sa labing dako nga mall karon sa dakbayan sa Sugbo ingon man sa lalawigan sa Sugbo.
Apan unsa ba diay ang nakalahi sa SM Seaside City Cebu sa ubang malls?
Dihang gibisita sa Sun.Star Superbalita ang mall, dako tuod kini diin anaa kini gidak-on nga 440,000 metro kwadrado nga mahimutang sa South Road Properties.
Aduna usab kini upat ka andana nga naglangkob sa Ground Floor, Upper Ground Floor, Second ug Third Floor.
Wa pa mahuman ang 25-storey nga tower niini diin anaa unya kini roof deck, viewing deck ug restaurants nga gikatakdang masinati sa publiko sunod tuig.
Gawas sa simbolo niini nga Cube, anaa kini olympic size nga ice skating rink nga gilinyahan sa publiko atol sa pagbisita ning mantalaan.
Nagkantidad og P380 ang unlimited skating diin P50 ang abang sa locker, P100 ang companion pass, P150 kun ganahan ka magpa-assist og coach sud sa 30 minutos samtang P100 matag oras ang skating aid.
Aduna usab kini upat ka state of the art nga cinemas, duha ka director’s club ug usa ka live theater nga gikatakda usab nga mobukas.
Nagkantidad og P210 ang regular cinema ug P350 matag tawo alang sa director’s club.
Alang sa mahiligon og bowling, P115 matag tawo, P50 ang shoe rental, P200 ang billiards matag oras ug P500 ang lane masking.
Dapat atngan sa publiko ang Sky Park diin anaa usab kini 1,500-seater nga sky hall alang sa dagko nga functions, events ug concerts.
Giatangan na usab ang children’s park diin mismo ang Sugbuanon nga designer nga si Kenneth Cobonpue ang nagdisenyo niini.
Gidisenyo ang mall sa international architecture, interior design ug planning firm nga Arquitectonica diin anaa kini nakabase sa Miami, Florida.
Makita usab nimo sa mall ang binuhat sa artist nga si James Doran-Webb diin usa ka kabayo ang makita sa mountain view nga ginama sa kahoy.
Aduna mountain wing, cube wing, seaside wing ug city wing ang mall.
Makaakomodar usab kini og 4,336 ka slots sa parking ug kon mag-abli na tanan tindahan niini anaa kini kapin sa 400 ka kan-anan ingon man tindahan.
Layo paman apan lakip sa proyekto sa SM Prime Holdings alang sa ilang 30 ka ektarya nga luna sa SRP mao ang usa ka ektarya nga Cebu Ocean Park diin sa tuig 2017 na kini gikatakda nga moabli.
Mao na unya kini ang mamahimong labing unang oceanarium sa tibuok Visayas ug Mindanao diin anaa kini 360 degrees nga tunnel aquarium, sea lions, bird show ug penguin’s park.