MANILA – Migilak sa bonggang production ang “Bituing Walang Ningning: The Musical” sa ilang katapusang spectacular performance ning tuiga nga gipapahigayon sa state-of-the-art Newport Performing Arts Theater, Resort World Manila, Pasay City niadtong Lunes.
Mapasigarbuhon nga gipahibawo sa director-scriptwriter Freddie Santos sa ilang malampusong pasundayag diin moabot ngadto sa 30,000 ka tawo ang misaksi sulod sa 22 nilang shows nga gisugdan niadtong Mayo ning tuiga.
Ang tulo ka oras nga stage adaptation sa classic Filipino drama nga nahimong blockbuster movie niadtong 1985 gi-produced sa Resort World Manila (RWM) nga maoy nakakuha sa Best Musical Production sa 28th Aliw Awards niadtong Disyembre 10.
Gihakot sab sa main cast ang major awards ug nag-una si Mark Baustista sa papel nga Nico Escobar isip Best Actor in a Musical; Best Actress in a Musical, Cris Villonco isip Lavinia Arguelles; Best Actor in a Featured Role, Ronnie Liang as Garry Diaz; Best Actress in a Featured Role, Menchu Lauchengco-Yulo sa papel nga Edith samtang Best New Female Artist ang Sugboanong talent nga si Monica Cuenco sa lead role nga Dorina Pineda.
Ang RWM production pinaagi sa Full Houst Theater Company inabagan sa Viva Communications, Inc. nag-feature usab sa local Filipino talents sama sa theater veteran nga sila si Jon Santos, Jay Roa, John Nite ug Michael Stuart-Williams.
Anaa sab si Antoinette Taus, alternate role ni Villonco nga Lavinia ug ang multi-talented nga si Epi Quizon nga ka-alternate ni Santos sa mahuyang nga iyaan ni Dorina.
Ilang gibuhi ang orihinal nga pelikula niadtong 1985 base sa komiks nga sinuwat ni Nerissa Cabral nga gidala nila ni Sharon Cuneta, Cherie Gil, Christopher de Leon, Jay Ilagan, Tommy Abuel ug Joel Torre.
Gi-atngan sa kadaghanan ang sikat nga linya “You’re nothing but a second-rate, trying hard copycat!” dungan sa pagsablig sa bino ni Lavinia ngadto sa dagway ni Dorina.
Adunay pipila sa mga scene nga gi-usab o gibag-o ni Direk Santos nga gibahin ngadto sa duha ka act, diin ang una nagpakita nga usa lang kay avid fan si Dorina ngadto sa sikat nga singer nga si Lavinia ug ang scenario diin mikatkat sa kalampusan si Dorina ug nahimong higpit nga karibal ngadto ni Lavinia.
Nabalik sa panumduman sa mga nanan-aw ang classic OPM songs nga gisal-ot sa pasundayag pinaagi sa orchestra ubos sa pagdumala ni Maestro Rodel Colmenar sama sa awit nga ‘Bituing Walang Ningning’, ‘Sanay Maghintay Ang Walang Hanggan’, ‘Kapag Puso’y Sinugatan’, ‘Pangarap Na Bituin’, ug ang ‘Magandang Gabi’.
Nangangha ang mga mitan-aw sa maong stage play sa ka-grandioso sa lights and sound effects naghatag og kinabuhi, ilabi na niadtong puti nga gown ni Cuenco nga nahimong projector diin mi-reflect ang mga suga.
Matod pa ni Direk Freddie nga mopahuway una ang tibuok production team sa “Bituing Walang Ningning” ning nagkaduol nga kasaulogan sa Pasko ug mobalik na sila og pasundayag sa unang semana sa Enero.