MACTAN- Cebu International Airpot (MCIA) andam na sa pagdagsa sa mga pasahero karong Pasko hangtod na sa Sinulog ug International Encharistic Congress sunod tuig.
Kini maoy gipaambit ni Andrew Harrison, GMR Megawide Cebu Aiport Corp. chief executive advisor, sa dihang nahinabi sa mga tigbalita kagahapon.
Gipakita usab ni Harrison sa mga tigbalita kagahapon ang mga pagpalambo nga ilang gihimo sud sa MCIA isip pagpakita nga andam na sila sa pagdagsa unya sa mga pasahero.
“What we decided to do is we to focus to meet the needs of the passengers,” matod ni Harrison.
Pipila sa mga pagpalambo nga ilang gihimo mao ang pag- upgrade sa ilang mga washroom, lightings sud sa tugpahanan, flooring, ug pagpalapad sa ilang espasyo aron kaminusan ang kahuot niini ug uban pa.
Dugang niya nga importante usab kanila ang detalye sa ilang gihimo sud sa tugpahanan nga maoy ika- 18 sa Best Airport sa Asya.
Gipun-an usab sa GMAC ang ilang mga counter sa tugpahan gikan sa 43 ngadto na sa 52 nga may gi- upgrade nga flight information display system; ATM machines gidugangan ug nahimong 32 gikan sa unom, pagbutang og taxi bay nga gawas ra mismo sa arrival area ug uban pa.
Giangkon ni Harrison nga dakong hagit alang kanila ang holiday season karong buwana ug mga kalihukan sa sunod buwan dinhi sa Sugbo.