LANGYAW nadakpan sa mga sakop sa City Intelligence Branch sa Cebu City Police Office nga ni-withdraw og kwarta sa usa ka ATM machine gamit ang nagkalainlaing credit ug debit cards sa usa ka dakong mall sa syudad sa Sugbo nga wa nganli sa kapulisan.
Lakip sa modus sa suspek ang pagpamalit og mga senina nga mahalon sa usa ka boutique gamit ang credit cards.
Ang nasikop mao si Denis Zadnik, 25, base sa pasaporte ug driver’s license niini, usa ka Slovenian national nga kasamtangan nga nagpuyo sa barangay Sambag 2.
Nasikop si Zadnik alas 9 sa milabayng gabii human mipalit sa usa ka boutique sa mall gamit ang mga card.
Matod ni Supt. Romeo Santander, hepe sa CIB, nga pipila ka mga buwan nang gi-0monitor sa security officer sa dakong mall ang suspek.
Giingong mo-transact ang langyaw sa mga boutique ug ATM machines pipila ka minutos sa di pa mosira ang mall.
Atol sa iyang pagkasikop, nakuha sa posisyon niini ang 28 ka nagkadaiyang klase sa credit card ug debit card, diin 11 niini nakapangalan kang Gervin Yuchengco, unom ka Visa credit cards ug tulo ka Master card ang nakapangan sa suspek ug laing walo pa nga way mga ngan.
Nakig-alayon na ang kapulisan sa bankers group, pagsuta kon si kinsa gyud ang mga tag-iya sa maong mga cards o grupo ba sa mga sindikato ug aduna bay kalambigitan ang Slovenian national sa Romanian national nga nasikop sayo ning tuiga.
“If this is a syndicated group, dako gyud. Continue gihapon ang atong follow up. Lisod pud baya magsige kag bayad. Wa ka kahibawo nakuhaan na diay ang imong account,” matod ni Santander.
Makig-alayon usab ang kapulisan ngadto sa Bureau of Immigration pagsuta sa iyang tinuoray nga sitwasyon ni Zadnik dinhi sa Pilipinas.
Sa record sa pasaporte niini, naabot ang maong langyaw niadto pang 2008.
Nagdumili na pagpakighinabi ang dinakpan sa mga sakop sa media sa dihang gisuwayan ni pagkuha sa iyang habig.
Kagahapon sa hapon gipasaka na ang kasong kalapasan sa Republic Act 8484 kon Access Device Regulations Act of 1998.
Matod ni Santander nga nipadayag ug kaandam ang mall ug mga tagdumala sa botiques sa pagpasaka og kaso batok sa langyaw, ug nanawagan usab sila niadtong nabiktima niini nga mopasaka og kaso batok kang Zadnik.