PAREHONG mosuway pagkulit og kasaysayan sila si back-to-back champion Jimmy Ty Jr. ug Jessa Balbona sa ilang pagsalmot sa tinuig nga Cebu Executives and Professionals Chess Association (CEPCA) grand finals sugod karong ala 1:00 sa hapon sa Handuraw Pizza Cafe and Resto Bar sa Gorordo Avenue ning dakbayan.
Ang tuyo ug tumong ni Ty mao ang mahimong labing unang grandslam champion samtang si Balbona mosuway pagposte og rekord isip labing unang babaye nga mopatigbabaw sa CEPCA “Battle of Champions.”
Hinuon gilaumang dili sayon ang pagasagubangon nila ni Ty ug Balbona tungod kay ang tanang partisipante nakatutok sa pagpakgang sa ilang mga intensyon.
Lakip sa mga magduduwa nga adunay kapabilidad sa pagpugong kang Ty sa Group A mao sila si Carlo Maraat, Martin Kwan, Rey Flores, Arnold Cadiz, Tony Cabibil, Amado Olea Jr., Carlo Maraat, Stein Torres, Jojo Muralla, Peterson Sia, Rogelio Enriquez, ug Ross Yamyamin.
Sa Group B, ang mga adunay katakos sa pagbabag kang Balbona mao sila si Jerry Maratas, Regelito Hortelano, Ruel Hortelano, Jun Kidlat, Elmer Odango, Felix Balbona, Romy Pialan, Mike Tinga, Jojo Paredes, Michael Ventulan, ug Edwin Cablao.
Ang mokampiyon sa matag grupo makadawat og P2,500, makaluklok og P1,500 ang 2nd placer samtang 1,000 sa 3rd placer.
Aduna sa’y side tournament nga ipahigayon alang sa mga wala nakalusot sa matag buwan nga qualifying event.
Ang kampiyon niini makakuha og P1,000, ang 2nd placer adunay P700 samtang ang 3rd placer makadala og P500.
Dungan ning maong mga torneyo ipahigayon ang CEPCA Christmas Party ug ang induction sa bag-ong mga miyembro sa asosasyon.
Alang ning maong kalihukan, ang mga sakop sa CEPCA adunay bayranan nga P500 samtang P250 sa dili mga miyembro. Lakip na niini ang bayad sa rehistrasyon sa torneyo.
Modugang og kolor sa kalihukan mao ang paglusad sa CEPCA sa ilang Silver Anniversary commemorative magazine nga giulohan og “Silver Shining, CEPCA@25.”
Napatik sa 28-page limited edition magazine ang mga panghitabo sa 25 ka mga tuig sa CEPCA gikan sa pagkahimugso niini.