ANG Interface Development Interventions Inc. (Idis) ug uban pang environmental organizations sa dakbayan sa Davao nagpadangat sa ilang mga pahasubo sa pagpanaw ni first district Councilor Leonardo Placido R. Avila III, kinsa mipanaw kagahapon sa kaadlawon, Disyembre 20, sa DMSF Hospital.
Si Idis executive director Ann Fuertes naghulagway sa kanhi konsehal nga usa sa mga kampeyon sa greener Davao gumikan sa napaambit niini nga dakong papel alang sa kaayohan sa kinaiyahan.
"When environmental issues did not yet figure notably in the lens of the policymakers, he set the tone and agenda for the City Council to look into protecting our watershed as a way of ensuring a greener future for the city," sulti ni Fuertes sa pakighinabi sa Sun.Star Davao kagahapon.
Ang mga ordinansa nga napasa ni Avila sa konseho mao ang Anti-Smoke Belching Ordinance (2006), Ban Aerial Spray Ordinance (2009), Watershed Code (2007), ug Establishment of Marine Protected Areas (2007).
Siya sab ang nagmugna sa Fisheries Code (2008), Rainwater Ordinance (2009), Ecological Solid Waste Management Ordinance (2010), Septage and Sewerage Management Ordinance (2010), ug Organic Agriculture and Bicycle Ordnance (2010).
Sa una niyang pagsud sa politika niadtong 1988, iya dayong gipanday ang Children's Welfare Code nga maoy nakapahimo sa dakbayan sa Davao nga Child Friendly City sa Pilipinas.
Samtang, si Geonathan Barro sa Masipag Mindanao nagsulti nga ang pagpanaw ni Avila di makahugno sa ilang pagbatok sa anti-genetically modified organism (GMO) movement sa Davao City, sanglit kini ang behikulo nga ilang ipadayon ang nasugdan sa kanhi konsehal.
Atol sa iyang termino isip officer-in-charge sa City Agriculturist's Office, nagpakabana sab siya sa pagpahunong sa “BT Talong” sa tugkaran sa University of the Philippines-Mindanao campus sa Barangay Bago Oshiro sa Tugbok District.
Sa laing bahin, mga konsehal sa dakbayan lakip na si Vice Mayor Paolo Duterte nasubo sa pagpanaw ni Avila.
Ang ilang kasubo gipadayag pinaagi sa Facebook post human nasayud nga namatay ang konsehal. (ICT)