DUHA ka mga rekisitos nga giduso sa kagamhanan sa dakbayan sa Sugbo alang sa aplikasyon pag-earth ball sa pipila ka mga kahoy sa Pope John Paul II Avenue alang sa umaabot nga mga kalihokan sa ika 51st International Eucharistic Congress ang kwestyonabli, sumala sa usa ka opisyal sa Department of Environment and Natural Resources sa Central Visayas.
Matod ni Dr. Eddie Llamedo, tigpamaba sa DENR 7, nga kinahanglan dunay lig-on nga representasyon ang Cebu City Government ug kanunay dunay mag-follow up sa aplikasyon sa ilang ulohang buhatan.
“Dapat duna gyud sila’y strong representation just what like Robinsons Galleria (Cebu) did kay two days ra to ila, para mapaspas ang issuance sa permit,” nagkanayon si Llamedo dihang nahinabi sa mga tigbalita kagahapon.
Atol sa 888 News Forum sa Marco Polo Plaza kagahapon, ang tigpamaba sa DENR 7 nibutyag nga naduso na nila ang hangyo sa kagamhanan sa dakbayan sa Sugbo alang sa pag-earth-ball sa 13 ka mga punoan sa kahoy sa Pope John Paul II Ave., sa Barangay Mabolo.
Sa suwat ngadto ni DENR Undersecretary for Field Operations Demetrio Ignacio Jr., si DENR 7 Regional Executive Director Isabelo Montejo nihangyo sa ilang ulohang buhatan sa pag-isyu og earth-balling permit.
Apan si Llamedo niingon nga dunay sipyat sa mga rekisitos nga giduso sa Cebu City government.
Una, way mga representante sa local organizing committee sa IEC ug environmentalist ang mitambong sa public consultation nga gipahigayon sa usa sa mga conference hall sa Cebu City Hall.
Suma pa niini, atol sa consultation way nauyonan ang mga tawo nga mitambong bahin sa pag-earth ball sa mga kahoy.
“...dunay kuwang because there was no clear agreement with people didto, mi-agree ba sila,” dason niya.
Ikaduha, ang certification o endorsement dili si Department of Public Works and Highways Secretary Rogelio Singson ang mipirma kondili si DPWH Cebu City District engineer Nicomedes Leonor.
“Seguro base sa two requirements, they have, puwede nila i-redo and submit supplemental requirements,” dugang ni Llamedo.
Siya nidugang nga giduso nila ang endorsement bisan og wala pa sila makakuha og baruganan gikan sa mga organizer sa 51st IEC kon uyon ba kini o dili sa pagkuha sa mga kahoy sa dapit.
Sa unang mga balita, si Cebu Auxiliary Bishop Dennis Villarojo, secretary general sa local organizing committee sa IEC Cebu, niingon nga uyon sila nga unom ka mga kahoy ug dili 13, ang i-earth ball.
Sa 13 ka mga punoan sa kahoy, siyam niini ang fire trees ug upat ang mahogany.
Gilakip sa endorsement ang mga suwat hangyo nila ni Dr. Librado Macaraya Jr. sa Cebu City Parks and Playgrounds Commission ug Cebu City Transport Office (CCTO) executive director Rey Gealon, endorsement gikan ni Nicomedes Leonor ug certification gikan sa mga opisyal sa Barangay Luz, nga wa mosupak sa pagkuha sa mga kahoy.