DUHA ka sunod-sunod nga chess tournament dinhi sa dakbayan ang nakalinya bag-o pa man mahuman ang tuig 2015.
Nakalista na daan ang Knights of the Square Table nga usa ka close tournament, diin ipahigayon sa Queen Angela RNB Chess karong Disyembre 26 dinha sa Misamis Oriental Capitol Chess Club.
Imugna kini sa duha ka grupo nga mao ang premiere group ug ang challengers group.
Modula sa premiere group gilangkoban sa pinili nga class B nga manunula nga sila Rey Laput, Jun Gunayan, Charles Laya, Ismar Estrella, Elias Balase, Ronald Canino, Aldin Ranario Jr., Brendix Emata ug Bobby Salomon.
Didto sa challengers section mao sila Nelson Lacson, Ruel Canino, Ronaldo Banaag, Jain Carlo Lascuna, Babert Paradero, Vanessa Magno, Randulp Cagula, Alden Ranario, Joebel Caayupan ug SunStar sports editor nga si Lynde Salgados.
Bago lang gianunsyo sa Explore MisOr Chess Club nga magpahigayon sila sa og chess tournament alang sa class B ug elementarya nga division.
Kapin P6,300 ang premyo sa class B nga torneyo diin ang kampyeon mouli og P2,000, samtang ang ikaduha ug ikatulo nga mananaog mobitbit sa P1,500 ug P1,000 nga salapi.
Ang makatungtung sa ikaupat ug ikalima, sunod-sunod, modawat og P700 ug P500.
Modawat og P300 matag usa alang sa top senior ug top lady.
Sa elementarya, kapin sa P4600 ang tanan premyo nga cash diin ang una paingon sa ikalima modawat og P1,500, P1,000, P700, P500 ug P300, sunod-sunod.
Anaa sad top lady 10-under ug top boy 10-under nga modawat og P300 matag usa.