PATAY ang usa ka lalaki human nalatayan sa trailer truck Martes sa kaadlawon human nabangga ang gimanehong motorsiklo sa Lapasan, siyudad sa Cagayan de Oro.
Patay ang biktima nga si Ric Balangao, 42, nga taga P2A, Casinglot, Tagoloan, Misamis Oriental, samtang ang nagmaneho sa trak nga si Julieto Calago Salumag, taga Zone 9 Cugman, ning siyudad.
Sa inisyal nga imbestigasiyon sa kapolisan pinaagi kang SPO2 Rolito Castillo, sa Police Station 3 (PS3) sa Agora, nasayran nga kalit lamang nga ni-left turn ang biktima, hinungdan nga nabanggaan kini sa trak.
Gidugang pa nga nakumpirma niini ang ngalan sa biktima sa nakuhang student permit niini.
Gumikan sa kakusog sa pagkabangga, nagrabehan ang likod ug ulo sa biktima ug nalatayan pa sa sakyanan, hinungdan sa hinanali niini nga kamatayon.
Sa pagkakaron, ang drayber ang boluntaryong mitahan sa kapolisan ug kasamtangang anaa sa kustodiya sa PS3.