NITAHO ang National Housing Authority (NHA) nga moabot sa 12,635 ka mga balay ang pwede nga mapuy-an ug dugang 8,820 ang makompleto sa di pa motapos ang 2015.
Aron masilbihan ang mga panginahanglan sa balay sa mga biktima sa kalamidad ilabi na kadtong mga apektado sa Bagyong Yolanda, ang NHA uban sa tabang sa Department of Public Works and Highways naghimo og “standard disaster-resilient housing” nga gidesinyo nga mobarog kon may bagyo nga ang gikusgon sa hangin 250 kilometros matag oras, matod ni Urban Development Coordinating Council (HUDCC) chair Chito Cruz.
Ang Government Resettlement Cluster gipangulohan sa HUDCC uban sa NHA nga maoy mopatuman sa pagtukod og permanente nga mga balay alang sa 205,128 ka mga pamilya nga naapektuhan sa bagyo.
Uban sa gikinahanglan nga pundo nga P61.2 bilyones, ang resettlement project, diin ubos sa pagpatuman sa NHA nihaum kini sa “build back better” nga prinsipyo isip pagtubag sa gibilin nga kadaot sa Bagyong Yolanda sa 14 ka mga lalawigan ug unom ka mga rehiyon sa nasod. Ang Eastern Visayas maoy grabe nga naapektuhan nga rehiyon.
Matod sa taho kutob niadtong Oktubre 20, 2015, ang pundo nga napagawas alang sa resettlement site project anaa sa P26.9 bilyones aron igasto sa 92,544 housing units. Moabot sa 17,641 ang nakompleto na. Rowel Montes