NAG-VIRAL sa social media ang hulagway ni suspended Mayor Michael Rama diin siya natulog sa lantay samtang nagpaabot nga sugdan ang Misa de Gallo sa Carbon Market.
Si Rama natulog nga nagtakilid, nag-unlan sa iyang wala nga braso ug nagsul-ob og jacket, jeans ug sapatos diin ang iyang tiil nilapas sa lantay.
Ang Carbon maoy lugar kaniadto nga baligyaan ni Rama og itlog dihang bayongbayong pa siya ug kasamtangang nagtungha sa kolehiyo.
Kini base sa hulagway nga gi-post ni Ivan Karamazov sa Maghisgot Kitag Politika, Bay niadtong Disyembre 28.
Ang maong post adunay 166 ka likes, 75 shares ug 222 ka comments gikan sa lainlaing mga tawo diin sagad niini naluoy kang Rama samtang ang uban niingon nga lain na usab kining drama sa mayor.
Ang uban niingon nga nga ang gibuhat ni Rama sama sa gipangbuhat ni Liberal Party standard bearer Mar Roxas.
Ang hulagway ni Rama giingong nakuha sa netizen niadtong kaadlawon sa Disyembre 17 sanglit gibati na og grabeng kakapoy ang suspended mayor gumikan sa kadaghan sa iyang mga appointment.
Si Rama way absent sulod na sa 10 ka tuig nga Misa de Gallo sa Carbon nga iyang gimugna aron makatambong sa misa ang mga vendor ug mga mangumprahay sa Carbon.
Sa maong post, ang mga dumadapig ni Rama ug sa iyang ikaatbang pagkamayor sa 2016 eleksyon nga si kanhi Mayor Tomas Osmeña nag-iyahay og dapig sa ilang mga kandidato.
“Bisan asa ibutang si Mayor Mike, molutaw gyud ang iya kamapaubsanon ug kutob sa iyang mahimo, iyang buhaton tanang pagtolun-an sa Ginuo ug ibaliwa ang tanang mga pagbiaybiay, pagbugalbugal, pagyamiid ug mga panghusga gikan sa mga garbuso ug mapahitas-on nga mga tawo nga gusto kaayong daygon ug abibahan ug magpakalimpyo,” tipik sa comment ni Pablo Jr. Bejer.
“Mar Roxas version sa Cebu” matod pa ni Zelrach Lim.
“Bisan dili ko taga Cebu City but I work there. Saksi ko sa asenso sa siyudad ubos sa pagdumala ni Mayor Rama.” paghulagway ni Selaroma Selaroma.
Apan aduna say neutral ug daw sa walay gilabanan sama kang Selaroma nga niingon “Kamo nga mga lumalaban maoy maglalis”.