UNA ta mosugat sa tuig 2016, atong hinumdoman ang mga nahitabo sa isports nga nakapakurat, nakahatag kalipay ug kasubo nga mga resulta.
2015 NBA Finals
ANG kulbahinam nga 2015 NBA Finals diin napildi sa Western Conference champion Golden State Warriors ang Eastern Conference champion Cleveland Cavaliers sa unom ka duwa (4-2) aron makuha sa Warriors ang unang titulo sulod sa 40 ka tuig ug ilang ikaupat sa franchise history, ug unang tim gikan 1990-91 Chicago Bulls nga mikampiyon nga way ekperensya ang tanan magduduwa sa Finals.
Si Golden State's Andre Iguodala ang giilang Finals Most Valuable Player (MVP).
Ang Warriors giulohan ni 2014-15 NBA Most Valuable Player (MVP) Stephen Curry samtang Cavaliers gipangunahan ni four-time league MVP LeBron James.
Ang duha ka tim parehong misulod sa serye nga nangusog makuha ang titulo human sa upat ka dekada nga Cavaliers wa makadaug sugod niadtong 1970-71 ug Warriors uwahing nakatitulo niadtong 1975.
Rousey KNOCKOUT!
Daghan ang nakurat dihang na-knockout sa ikaduhang round ang giilang pinakakuyaw nga babaye sa UFC nga si Ronda Rousey nga nakigsangka ni Holly Holm.
Tungod niini, nakoronahan si Holm isip bag-ong UFC's bantamweight champion samtang ginahan-ay na sab karon ang rematch tali sa duruha sa Hulyo sunod tuig nga posibleng himuon sa Los Angeles ug Texas nga atangan na sab sa mga fans.
Una niini, ang bag-ong kampiyon misulti dayon nga abli siya sa rematch apan di siya moaway sulod pito ka bulan aron pangandaman ang unang pagdepensa niya sa titulo.
Comeback of the Year ni Donaire Jr.
Gituohan gayud nga dunay 'comeback' mahitabo sulod sa ring ug kadaugan nga napamatud-an kini ni Nonito Donaire Jr. karong tuiga human napakyas sa milabay nga tuig.
Human nakasinati og unang knockout sa kamot ni Nicholas Walters niadtong 2014, Donaire naglisud na sa pagbangon.
Apan human sa duha ka away niadtong Marso ug Hulyo, nabalik sa kamot ni Donaire ang world championship karong bulana dihang iyang napalukapa ang kuyaw, gahi ug world rated si Cesar Juarez sa Mexico aron makuha ang bakanteng WBO world super bantamweight nga titulo.
Gilas pakyas sa China sa Fiba
NAPALONG kadali ang ginapandangoy nga maka-abante ang Gilas Pilipinas sa 2016 Rio Summer Olympics dihang napildi sa China sa 2015 FIBA Olympic Qualifying Tournament, 78-67, niadtong Oktubre 3 didto sa Changsha, Hunan, China.
Kini ang ikaduha nga sagunsong nakaplata lang ang nasyunal tim human mapakyas sab sa dakong tim nga Iran niadtong 2013.
Pacquiao vs. Mayweather
GIKASUBO sa tanang fans sa tibuok kalibutan ang resulta sa giilang The Fight of the Century, or the Battle for Greatness tali nila Floyd Mayweather, Jr. ug Manny Pacquiao.
Sa maong away niadtong Mayo 2, 2015 didto sa MGM Grand Garden Arena sa Las Vegas, Nevada midaug si Mayweather pinaagi sa unanimous decision, 116-112 ug 118-110 nga ang duha ka judges mipabor kaniya.
Kahinumdoman nga halos unom ka tuig sugod 2009 ang pakig-negosasyon sa tim ni Pacquaio ngadto kang Mayweather tungod sa mga isyu sa pagbahin sa kita, drug testing, lugar diin himuon ug uban pa hangtud nahinayon ning tuiga.