KAANGAYAN sa hustisya, paglantaw sa kauswagan sa kinabag-an, malambuon nga bag-ong tuig ug pagpadayon sa nasugdan nga mga programa ug proyekto ang panghinaut sa mga opisyal sa pangagamhanan ug simbahang Katoliko sa 2016.
Lima ka dagkong mga kalihukan ang mahitabo dinhi sa Sugbo karong bag-ong tuig--- ang umaabot Sinulog Festival ug International Eucharistic Congress sa Enero, presidential election sa Mayo, ug ang barangay ug Sangguniang Kabataan elections sa Oktubre.
Ang 2016 kay tuig sa fire monkey.
Si Justice Gabriel Ingles, executive justice sa Court of Appeals Cebu Station, nanghinaut nga sa bag-ong tuig mas mapalambo ang ilang serbisyo ngadto sa publiko pinaagi sa pagpaspas pagsulbad sa mga kaso nga ilang gihawiran nga sa kasamtangan anaa sa 3,800.
“Meaning we will maintain our norm which is that our monthly disposal rate should be consistently be more than the number of cases filed,” nagkanayon si Ingles sa text message ngadto sa Sun.Star Superbalita kagahapon.
Tinguha nila nga sa tungatunga sa tuig nga labing sayo o sa hinapos sa tuig, makahukom na sila sa mga kaso nga giduso aron desisyon sa 2015.
Siya nipasalig nga magpabilin ang ilang kaugalingnan, pagkapatas, matinuoron ug kaabtik sa paghatag og hustisya.
“For us in the judiciary, and the Court of Appeals in particular, we have been gifted with a special calling, that is to dispense justice through law,” dugang ni Ingles.
Si Msgr. Esteban Binghay, episcopal vicar sa artsidyosesis sa Sugbo, nanghinaut nga minosan sa mga pulitiko ang pagka partidista sa bag-ong tuig ug makaamgo nga sila anaa sa katungdanan aron moserbisyo sa katawhan ug dili sa ilang mga partido.
Siya nipasabot gumikan sa dili maayong relasyon sa pipila ka mga pulitiko maapektuhan ang paghatod sa batakang serbisyo ngadto sa katawhan labi na sa mga kabos.
Iyang gihimo nga sanglitanan ang nahitabo karon sa siyudad sa Sugbo nga nagkainit ang panag-atbang sa Bando Osmeña Pundok Kauswagan (BOPK) ug Team Rama diin napagan ang mga molupyo.
“Ang resulta ang mga tawo nisamot og kalisod. Kay ang ilang gitan-aw ang ilang partido, unsay makaayo nila, ang katawhan ilang nakalimtan,” pahayag ni Binghay sa Sun.Star Superbalita.
Siya ug si Msgr. Joseph Tan, tigpamaba sa artsidyosesis sa Sugbo, nanghinaot usab nga mas mogahin og igong panahon ang mga pari sa pagpangalagad sa mga kabus ug nanginahanglan labi na ang pag-edukar ug pagsangyo sa mga pulong sa Ginuo.
Si Gobernador Hilario Davide III nanghinaot nga usa ka maayong tuig ang 2016 nga maghatag og kauswagan sa lalawigan sa Sugbo ug mas mapalambo ang paghatag og batakang serbisyo ngadto sa katawhan labi na ang pagpadayon sa nasugdang mga programa ug proyekto.
“We hope for the best sa 2016. We always hope we have a better year,” dason sa gobernador.
Si Bise Gob. Agnes Magpale nanghinaot nga magpadayon ang pagka patas sa mga sakop sa media labi na kay nagsingabot ang piniliay sa Mayo.