UNANG semana sa tuig. Seguradong bug-at pa sa lawas ug hunahuna sa eskuwela ug trabaho. Ang akong mga gagmay'ng anak bitaron pa sa higdaanan aron motindog ug maligo kay basin ma-late sa klase. Lisud sab pakaunon og sayo kay naanad nga dugay mangaon.
Ang mga nagbantay sa ilang timbang sayo kaayo nag-jogging sa People's Park o sa ilang nataran aron makibhangan ang bilbil nga nadugang sa bakasyon.
Ang mga mahiligon sa ehersisyo nangandam na sa ilang eskedyol kung unsay tripping karong semanaha sa samang katuyoan.
Ang mga pundok relihiyuso sama sa Brotherhood of Christian Businessmen and Professionals (BCBP) nangandam na sab sa ilang matag Sabado nga Breakfast Meeting, Worship Night, Action Group Meetings ug preparasyon sa formation sa mga trainees sa Philippine National Police sa Mintal karong bulan sa Pebrero.
Nindot sab ang negusyo ug operasyon sa atong kompaniya sa Sun.Star Davao Publishing, Inc., busa ang mga opisyal ug kawani naghandom ug nagtinguha og laing mas mabungahong tuig sa 2016.
Gawas sa negusyo, para kanako exciting karong tuiga tungod sa umaabot nga bugnong lugaynon sa bulan sa Mayo.
Mas nahimo kining mabulukon ug kulbahinam tungod sa pag-apil sa atong manok nga si Mayor Rody Duterte sa pagka-presidente.
Di na makatulog ang mga haring gangis sa kampanya ni Mayor nga taga-Davao sama nila ni Maribojoc Mayor Jun "White Hair" Evasco, kanhi Konsehal Pit Laviña, Bong Go, Butch Ramirez ug daghan pa.
Sa dili madugay masabtan nato nga ang eleksiyon maoy "favorite past time" sa mga Pinoy. Dinhi mogawas ang mga eksperto sa politika nga dili tinuod eksperto, mga lider nga way tawo, mga balingbing nga napulo ang suwab, hawod nga campaigners nga way nakabig, mga maayo moistorya nga way istorya, mga attack-collect, defend-collect (AC-DC) nga sakop sa media ug mga politikong malipayon ug dili gyud magkusmod.
Busa sugod karong semanaha, adunay bag-ong public service and affairs program sa AM Station sa Radyo ni Juan (kanhi DXRA) nga "Kumusta Davao" o kaha "Barikada sa Davao" matag 9:00-10:00 sa buntag matag adlaw.
Pangumustahon sa maong programa ang mga ordinaryong Dabawenyo kung unsa nay dagan sa ilang kinabuhi karong tuiga.
Duna bay kausaban gikan sa niaging katuigan ug karon, ug kung wala ngano man?
Buot hisgutan usab sa maong programa ang mga serbisyo sa pribado ug gobyernong ahensiya sa pagpalambo sa ekonomiya, pagpadaghan sa trabaho, edukasyon, turismo, seguridad ug mga isyu sa nagkadaiyang sektor sa katilingban.
Adunay segment kabahin sa mga kasikas sa barangay nga puwede ninyong ipasang-at ug ibatbat sa kahanginan ug siyempre dili mawala ang isyu sa Eleksiyon 2016.
Posible interbyuhon dinhi ang mga nasudnon ug lokal nga kandidato ug ang ilang mga plataporma de gobyerno aron masayran sa tanan.
Adunay segment usab kabahin sa pagtuki sa isyu sa mga kabataan, kababayen-an, lumad, trabahante, ug uban pa nga may kalambigitan sa kinabuhi sa Davao.
Busa iapil unta nato kini nga bantayan matag adlaw kauban sa atong mga kinaham nga programa ug drama sa radyo.
Henerasyon karon sa impormasyon busa makisayud kita kay "ang katawhan nga maalamon maoy nasud nga malambuon."