SECTIONS
philippines
Monday, December 06, 2021

Babaye nga nidagit og bata nasikop

NALUWAS na ang masusong lalake nga gidagit sa usa ka babaye nga nagpatuong nars sa Vicente Sotto Memorial Medical Center (VSMMC) niadtong Lunes sa udto.

Ang nahimutangan sa babaye nasubay kagabii human manawag sa photographer sa Sun.Star Superbalita Cebu Alan Tangcawan ang usa sa sa mga silingan sa suspek nga kasamtangang nagpuyo sa sityo Fatima, Lahug, dakbayan sa Sugbo.

Si Tangcawan nag-post og video ug sa iyang cellphone number alang niadtong mga tawo nga makatabang pagtudlo sa nahimutangan sa babaye.

Ang Sun.Star Superbalita Cebu daling nakig-coordinate sa Criminal Investigation and Detection Group (CIDG) Central Visayas aron adtuon ang gipuy-an sa suspek nga si Melissa Londres, 26, call center agent, taga Barangay Tipolo, siyudad sa Mandaue.

Lakip sa gidala kagabii sa buhatan sa CIDG human sa operasyon ang uyab niini nga si Philip Winfred Almeria, 25, taga sitio Fatima.

Usa sa mga silingan nila ni Londres ug Almeria nitug-an sa Sun.Star Superbalita Cebu nga nagduda sila human makita ang hulagway sa babaye ning mantalaan nga susama og dagway sa kuha sa close circuit television (CCTV) camera.

Human pahibaw-a sa Sun.Star Superbalita Cebu, nihimo gilayon og operasyon ang CIDG pinangulohan ni Sr. Insp Delfin Bontuyan ug SPO2 Roel Leyson ug gisulod ang giabangang lawak sa duha.



Ang balay nga gipuy-an sa duha lugsungon og 500 metros gikan sa highway sa Veteran’s Drive sa Barangay Lahug.

Ang mga silingan sa suspek nga di magpahingan nagkanayon nga ilang nakita nga nagkugos si Londres og bata niadtong Lunes sa hapon.

Nisamot pa ang ilang pagduda sa dihang ilang nakita sa television ang CCTV footage.

“Nagduda gyud ko ana pag-abot diri, Sir, kay ang nakita namo sa TV mao man ang among silingan,” sigon ni alyas Baby.

Apan hugot nga nihimakak si Londres nga iyang kinawat ang bata sanglit niadtong Lunes pasado alas onse sa buntag nanganak siya sa Holiday taxi gawas sa BC Homes, barangay Lahug.

“Nanganak man ko. Akoa nang bata, uy. Nanganak man ko sa taxi,” matod ni Londres.

Si Jonathan Celadenia, amahan sa masuso, niabot sa buhatan sa CIDG mga alas 8:40 kagabii.

Iyang positibong giila si Londres nga maoy nikuha sa ilang anak.

Iya usab nga giila ang masuso nga iyang anak.

“Mao gyud na akong anak, Sir. Mao pud nang bayhana bisan pag sap-ungan ang nawong anang bayhana,” matod ni Jonathan.

Sa atubangan ni Jonathan padayon nga nagmagahi sa pag-angkon nga iyang kinawat ang bata sanglit iya kining anak.

“Iya na man nang giangkon, uy. Akoa man gyud na, Sir,” matod ni Londres.

Gipaubos usab sa imbestigasyon sa CIDG si Almeria tungod sa pag-insister ni Londres nga iyaha ang masuso.

Matod ni Sr. Supt Marlon Tayaba, hepe sa CIDG Central Visayas, nga kon mamatud-an nga di iya ang bata, mag-atubang kini og kasong kidnapping nga posibling mabilanggo sa tibuok niining kinabuhi. (Dugang taho ni Alan Tangcawan)
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!