KIDAPAWAN CITY -- Pito ka ektaryang' gomahan o mga rubber trees ang nadamay sa duha ka mga managlahi nga grassfire nga miulbo didto sa Makilala sa probinsiya sa North Cotabato alas 2 sa hapon niadtong Dominggo.
Ang unang grassfire nahitabo sa onse ka ektaryang kasagbutan didto sa Barangay Buhay ug gituohang naitsahan og upos sa sigarilyo.
Samtang ang ikaduha, nahitabo didto sa Barangay Kisante diin pito ka ektaryang rubber tree plantation ang gilamoy sa kalayo.
Ang maong plantasyon sa rubber trees giingong gipanag-iyahan sa usa ka Romeo Dampas, 49, minyo, taga Purok Talisay, Makilala.
Subay sa pagbanabana, miabot matud pa og gikan P1 hangtud P2 milyones ang nahimong danyos sa sunog sa gomahan.
Gipaimbestigahan na ni Makilala Mayor Rudy Caoagdan ang grassfire sa Barangay Buhay ug Kisante kung gituyo ba ang pagsunog o aksidente lang gumikan sa kainit sa panahon.
Samtang nagpasidaan si Caoagdan ngadto sa mga molupyo ilabi na kadtong duol sa lasang nga dili mokompiyansa ug mag-amping sa mga grassfire ug forest fire.
Una nang nagpagawas og kamandoan ang Kidapawan City Tourism Office nga ihunong una ang pagsaka sa mga mountaineers sa Mount Apo gumikan sa kainit sa panahon aron malikayan ang forest fire o grassfire.