SI BACK-to-back SM Bowling Millionaire’s Cup champion Tessa Dianne Galendez nakakuha na sab og laing Davao Tenpin Bowlers Association (Datba) title aron buksan ang iyang pagsugod sa kampanya sa 2016.
Ang 21-anyos nga Chinabank teller, kinsa dunay 11 handicap, miigo og 872 pinfalls sa tulo ka duwa aron mokampeyon sa Datba weekly singles tournament.
Gipildi ni Galendez ang iyang amahan nga si Art kinsa miiskor lang og 826 pins samtang Fernie Ballano mitala og 825 pinfalls alang sa ikatulong puwesto.
Ang tulo nga nanguna, miuli og P800, P500 ug P400 sa maong han-ay.
Ang kampeyon mi-post sa iyang Facebook nga dunay hulagway, “What a good way to start the year. Yay thank you Lord!”
Miabot sa 19 ka mga magduduwa ang nakigtigi sa matag semanang torneyo alang sa monthly finals nga dunay dagkong premyong kuwarta ug customized tropeyo ihatag sa mga modaug.
Naglaum siya nga makasikwat pa og dugang titulo karong tuiga.
Sunod, makigkompetensiya si Galendez sa Datba Bowler of the Year grand finals diin target sab niya modaug.
“Plan namo ni Papa practice mi everyday maski three games each day ra. Tanan man posible modaug Ma’am. Hehehe, maayo man pud silang tanan so akoa jud diri kay himuon lang jud nako akong best.” (MLSA)