Way makapukan sa akong debosyon sa Senyor: Rama

BISAN og gisuspenso, gipadayag ni suspended Cebu City Mayor Mike Rama nga wa kini makawa sa iyang kadasig sa Sinulog.

Sa iyang pakigpulong atol sa Sinulog sa Kabataan sa Lalawigan ka­gahapon sa Cebu City Sports Com­plex, ang mayor namahayag ang hagit sa Sinulog nga siya gisuspenso.

Sukad nagsugod siya sa Sinulog Foundation, Inc. niadtong 2001 hangtod sa kasamtangan, way makalupig sa iyang loyalty sa Santo Niño.

Siya mapasalamaton nga bisan og dihay higayon nga di maayo ang relasyon sa dakbayan ug lalawigan sa Sugbo apan gipadaplin ang pulitika sa Sinulog.

“Only in Cebu, politics will be set aside when we talk about Sinulog. Why? Butangi og pulitika ang Sinulog, mangluod ang Sto. Niño,” dugang niya.

Si Bise Gob. Agnes Magpale, nagrepresentar sa provincial government, namulong ang Sinulog, usa ka paagi sa pagtipig sa kultura sa Sugbo nga usa sa ilang mga mandato.