IMPRESIBONG naangkon ni Nazario Ubanan ang titulo sa 3rd Goldcrest Marketing Corporation Random Chess Blitz Tournament niadtong Huwebes didto sa GMC Building, Pabayo-Abejuela St.
Hapit naharos ni Ubanan ang tanan niyang tahas sa 14-man round robin human miposti og 12.5 puntos sa kataposang 13 ka round.
Iyang napilde ang tulo ka National Master nga sila Rustum Tolentino, Levi Mercado ug Roly Tan, Fidemaster Lyndon Lumancas ug ang malig-on nga si Johnnel Balquin.
Apil sa iyang mga biktima mao sila Randolph Dalauta, Alfredo Rapanot Jr., Rodney Opada, Allan Cantonjos, Joseph Maestrado Jr., Paciano Gulle ug Lennon Hart Salgados.
Si Basilo Pandan lang ang wala niya napilde human matabla ang ilang dula. Nagsunod sa ikaduha nga pwesto mao si Tolentino nga nihuman og 10 puntos, samtang naa sa ikatulo si Balquin nga nitala og siyam ka puntos.