GISUGDAN na og gamit sa Cebu City Government ang P6.4 bilyones nga maoy giaprobahan sa konseho para sa tuig 2016.
Kini ang gibutyag ni Cebu City Budget Officer Marietta Gumia sanglit nagsugod na sila og proceso sa mga dokumento aron ma-sweldohan ang kapin 4,000 ka mga empleyado.
Ang mga regular nga empleyado sa City Hall nagdawat sa ilang sweldo matag semana samtang ang mga casual matag 15 ka adlaw.
Nadawat sa budget officer ang kopya sa budget ordinance niadtong adlaw nga Martes para annual budget nga gibutangan og marking sa Sangguniang Panlungsod nga “deemed approved”.
Gipasabot ni Gumia nga wala na siyay mahimo kon dili ang pagpatuman sa budget human usab napasar ang resolution sa konseho niadtong Enero 6 nga nagmando sa sa budget office pagpatuman sa budget ordinance.
Una niini, si Acting Mayor Edgardo Labella wala nihimo og aksyon sama sa pag-approve o disapprove o pag-veto sa napasar nga budget ordinance inay iyang giuli ngadto sa konseho.
Ang Budget Office wala dayon mipatuman sa budget ordinance nga gi-aprub sa konseho sanglit aduna silay managlahing baruganan tali sa executive department.
Si Labella nagtuo nga wala mahingpit ang pag-aprub sa budget ordinance sanglit para niya nagkuwang og usa ka boto para hingpit nga mapasar ang ordinansa subay sa absolute majority.
Si Konsehal Eugenio Gabuya Jr., nagkanayon nga kon molapas na sa 10 ka adlaw ug dili pa maaksyonan sa executive department ang budget ordinance makonsidera kini nga aprobado base sa balaod.
Ang konseho wala naminaw sa opinion sa acting mayor ug gipahimug-atan nga legal ang ilang pag-aprub sa budget ordinance niadtong Disyembre 18 sanglit sobra sa katunga sa boto ang ilang nakuha (siyam ka konsehal sa Bando Osmeña Pundok Kauswagan)gikan sa 13 nga nitambong sa session.